DAWN 5

 

DAWN – 5

(story of my life)

 

Tukverhah chuan dak chhuakin police station kawta mi phe nuai nuai chu ka thlir reng a, ka rilruah thil pakhat chiang takin a rawn lang a, ka mimal buaina leh harsatna avangin ka hna thawh chhan hi ka theihnghilh tur a ni lo tih chu. Dawhkana ka lukhum chu la in ka han khum a, conference room lam pan chuan ka kal a, vawiina kan thil ngaihtuahho tur ka thulh fel titih chu tih zawh ka duh leh ta zawk.

 

Khatia ka hnaah tling chho ve zela training hautak zet ka hmachhawn lai kha sawi chhuah fo ka duh lo. Kan hma hunah hlim taka chhungkua kan din ve theih nan tia beiseina nen hrehawm pawh ka tawrh laia Dinpuii hnen atanga inthenna thu han dawn zet kha chuan min titliak hnawp a nih kha. Ka training dawn pawha hlim taka kan inthlah laia chutiang thil han tawn chu mipa hi a lo mipa hleihtheih loh loh a ni ber e. Thla khat dawn chu zan mut ka harsat a, chaw ka ei hlei thei lo a, ngaihtuahna mumal ka pu thei lo. Min phatsantu avanga chutianga awm chu ka duh lo a, keima theihna pawhin talchhuah tumin ka bei ve nasa, mahse, ka hlawhchham chiang the khawp mai. Mahse, mihringte hi indawmkun reng tura duan kan ni miau lo a, keipawh thla a vei chuan ka zia chho ve ta. Chutiang chu ni mah se Dinpuii ka theihnghilh ngai lova, nakinah kan inhmuh leh hunah kan boruak chu a tha leh maiin ka ring tlat a ni.

 

Kan training zo a, keipawh Kolasib ah SDPO hna chelh turin ka post hmasa ber chu ka zawm fel a, khawhar leh kim lo tak chungin a ni ka zawm ni. Kan hnaah kan buai em a, chu chuan min chhawk angreng ta phian zawk a, chutiang ni lo se chuan tawrh a huphurh thin khawp ang. Khaw mi an fel a, nuam ka ti chho ve ta vat a, a hminga officer ni ve ta chu nuho biak that ka hlawh a, fanu nei tha deuhho chuan an zuar a ni ber thin. A chang chuan ka hlimna tur kawn zawna chungte chu han kawp ve pawh ka chak ve fo a, mahse, tu thinlung mah hi infiampui nan hman ka duh lo.

 

Kum a vei a, Aizawl lamah training pawimawh a awm avangin keipawh ka chho ve a, hna pawimawh a awm a nih loh chuan ka haw ngai lo a, ka chhungte lung a awi lo lek lek thin tih ka hria, mahse, chhuah chhoh hi ka chak hlawl lo a ni ber ang chu. In ka thlen chuan ka chhungte bulah ka haw tur ka hrilh lawk lem lo bawk a, min hmu chu an lo phawk hle a, ka nu chuan min hauh inpeih atin min lo hmuak bawk.

 

“I pa in nizanah ka mumangah Tea ka hmu a, a rawn chho hnai aniang ati che a, a sawi ang chiaha zuk awm che a” a lo ti a, ka nui ringawt.

 

“Sir, kan in lamah ka va phei dawn asin, naktukah dar engzatah nge ka rawn kal ang?” driver Sangtea’n  chuan a ti a.

 

“I haw khat bawk a, tun tum chu I nupui fanaute lo va awplum tha la, keimahin ka in khalh thei mai ang. Zirtawp zingah haw thla turin I rawn phei dawn nia” ka ti a, lawmthu a sawi luam hnuauh a haw ve ta a.

 

Ka inbual fai a, chaw kan ei zui ta mai a. Ka nu leh pa chauh in nghak an nih tawh avang hian ka putea fanu Marini, college kal lai kan hnena awm turin kan ti a, min rawn awmpui thei hlauh a, inngaihtuah pawh a na lutuk tawh lo. Chaw eikhamah inchung lamah chhoin meizial ka zu a, ka pa hmuha zuk hi tun thlenga ka la ngam loh vangin ka zu ru hram hram thin. Aizawl khawpui chu ka han thlir vang vang a, Dinpuii te veng lam chu ka han hawi a, tunah chuan a zirlai pawh a zir zo tawh ngei ang tih ka hria. Engtin tak awm zel ang maw? Hmuh ka chak ngawih ngawih a, tlawm ka inti si, chu ber chu hrehawm ka ti. Mahni inphahhniamin pan tawp ila chuan engtin emaw tak kan pahnih chungchang pawh hi ka tihfel theih ka inring a, chutiang ti tura tlawm kha harsa ka ti si. Marini chuan min rawn ko lauh lauh a.

 

“I thiante an lo leng” a tih avangin ka meizial chu ka tihlum a, inhnuai lamah ka chhuk ta a.

 

Inchhung ka luh chuan Nutei leh a thianpa an lo thu a, Nutei’n min hmuh chuan a lo nui sang a.

 

“Engtin nge ka rawn haw tih I hriat a?” ka ti a, a thutna epah chuan ka thu nghal a.

 

“Kei chu ka hriatna hi a tha riau a, heti tlat zel hi maw le” a ti a.

 

“Hei ka thianpa Mala kha a nia, inhmelhriat ve phawt teh u” a ti a, kan han inchibai a.

 

Mala hi han sawi kai zawk ila, Aizawl college ah lecturer hna a thawk a, a pu minister a ni na in sawichhiatna tur tun thleng hian an la awm miah lo niin ka hria. A term hnihna a hmang leh mek a, hming hliauna nei lo awmchhun a ni maithei. Nutei nen an han thu tlang chu inhmeh ka ti ru khawp a, innei se chuan nupa inhmeh berte zinga an tel pawh ka ring. Mala hi pa lian leh hmelchhe lo tak a ni a, amah a zahawm riau bawk a, Nutei hi a duh thlu ve ngang niin ka hria, a awmdanah hian a tilang hreh lem lo bawk.

 

“Khawnge in kal dawn tak tak a?” ka han ti leh a.

 

“In thenawmah hian ka pa in pawisa min lamtir lawk a, I motor ka hmu a, kan rawn chho a nih hi” a ti a.

 

“Kolasib chu a nuam bawk maw?” Mala’n a lo ti ve chuar chuar a.

 

“Nuam ve mai zel, khawi hmun pawh hi nuam tih han tum phawt ila” ka ti ve a.

 

Eng engemaw sawiin kan titi ve ta reng a, dar 9 a rik chuan haw an tum ve ta a. Anmahni thlah tur chuan ka chhuak ve a, Mala chu a kal hmasa deuh a.

 

“Dinpuii chanchin I hre ngai em?” a ti a.

 

“Aih, tihian kan inthen atang khan chanchin kan nei tawh lo a ni mai” ka ti a.

 

“Pawi ka tihpui che, a chanchin ka lo sawi ve ringawtte kha ka inthiam lo ngawih ngawih a, hmaichhana ngaihdam dil che ka duh a. Mi thusawi ka lo sawi chhawng ve te kha hrehawm ka ti lutuk a” a ti a.

 

“Nute, a ho lutuk. I thusawi vang khan ka thinlung a danglam phah lo a, ka hma khua I ngaih vangin I thu hriat min hrilh tih ka hria alawm. Kha mi vanga inthen lah kan ni hek lo. Engmah inthiam lohna tur a awm lo aw” ka ti a.

 

“Naktuk tlaiah chaw rawn ei la” ati a.

 

“Naktuk hi kan training hun a nia, ka hman ka va ring lo em” ka ti a.

 

“I phakar, ka lo inbuatsaih tho tho ang. Friday ah haw I tum leh dawn chiang si” a tih chuan ka lo nui ri deuh hak a.

 

“Tinge maw min hriatchian em em le?” ka ti a. Mala kan va pawh tak avangin min chhang tawh lo. Kan in mangtha hnuah an tlan liam ta a, ka thlir vung vung ringawt.

 

Nutei rilru tur awmang pawh hi ka hrethiam lo. Mala nen an inkawp reng chung hian min duh ve tlata hriatna ka nei a, nuam ka ti chiah lo. Chutih rual chuan midang tan chuan ka phal chiah bik bawk si lo a, hnaih tam lo ila ka pangngai leh mai chuan ka ring.

 

A tuk nilengin kan training a, chaw hnu lamah chuan ka mawng a za deuh tlat tawh. Nizan ka mumangah Nutei ka lo hmu nasa a, ka harh hnu khan ka ngai zui ta veng veng a, hmuh leh hlan mawlh ka nghakhlel. An ina chaw ei kha ka han hnial zet na in min lo rin tho ka ring a, a tawp nan va hmuh leh chu ka tum. Mi inkara tlak zeh hi ka duh lo a, ani pawh Mala nen ka thlah hlen tawh ang tih rilru chu ka pu a, amah hmuh vat chu ka duh a ni ber. Kan ban veleh an in lamah ka inkhalh nghal a, ka uniform nena han kal chu ka inthlahrung deuh na in kan bang tlai bawk nen inthlakna hun neiin ka inhriat loh vang a ni. An in kawtah ka motor ka hung fel a, an ui Tommy chuan min lo lawm a, min lo la hre ve aniang min lo lawm ve vat vat mai. Ka thawm hriain Nutei a rawn chhuak vat a, min hmuh chuan a nui var var a.

 

Pu Hminga leh Nu Masangi pawhin min lo lawm thiam khawp mai. Anni pahnih hi chu nu leh pa en hian ka en lo thei lo, engkima min duhsak em emtu an ni a, ka theihnghilh ngai lo. Nutei’n ei rawng a bawl mawlh mawlh a, keini a nu leh pate nen kan lo inkawm thung. Nutei che vel chu ka lo melh leh reng thin a, a thiltih engkim chu a fel thlap mai a, vawihnih lai chu kan mit leh mit a intawng. Ka hawisan rang thei viau lehnghal.

 

“Joseph, hmarcha hi lo rawt teh” tiin min rawn ko a.

 

Ka hmarcha rawt lai chu a lo melh uluk viauin ka hria, ka nuih chu a za deuh hlek a, ka lo nui chhuak deuh a ni ang.

 

“A va mak vur vur ve” a ti a, ka chip rang ngang mai.

 

‘Mala I sawm ve lo a”

 

“Engvang ngawtin?”

 

“Changtupa berte chu”

 

“Changtupa tih tur em chu a ni dawn em ni? Ka thianpa a ni ve mai a, nangmah leh keimah ang bawk hian” tih pahin chiang zetin min melh.

 

“Ka awih lo emai” ka lo ti hluk.

 

“I awih kher pawh a ngai chuang lo a” a tih chuan a thutak hmel riau a, ka uang duh ta vak lo.

 

“In inhmeh ka lo ti asin” ka ti ro halh a.

 

“Ka thiante zawng zawng pawh hian min duh pui vek alawm. Keipawhin duh thei ila ka ti, ani tluka min nghak peih hi an awm ka ring chuang lo” ati a.

 

“Tun ang laiah chuan hetiang bak baka tha an awm si lo a, hmeichhe tan chuan hmangaihtu cheu hi an pawimawh a nia” ka han ti ve ngial a.

 

“Mi dang ka la nghak a” ati zuai raih. Ka va melh a, ka hmarcha rawt chu a lo melh daih.

 

“I nghak tih a hria em?”

 

“A hre lo aniang”

 

“A va harsa thin ve. A hriat bawk si loha I hrilh bawk si loh chuan”

 

Ka thin chu a phu deuh dut dut, keimah ni turah te ka han dah chhin vel a, ka ring chiah si lo.

 

“Keimah ang bawkin ani chuan midang nghah a nei ve tho sia, hrilh chi pawh a ni lo” tih pahin a tho nulh a, chawhmeh chu a va chawk ta daih a.

 

Ka ngaihtuahna a vak nasa ngang mai, a theih chhung chu Dinpuii nghah ka tum tih kha kan inthen tih ka hrilh hlim khan ka sawi ngei mai a, chu chu a sawi tihna a ni angem? Ka awm chu a nuam ta vak lo, a chhan chu Nutei hian min lo duh ve nit a se amah tina tu ka nih ka hlau. Dinpuii ka beiseina hi a la tawp vek si lo a, ka hnenah lo kir ta se ka thinlungah hian hmun a la chang thuk tih ka hre tho si, chu tak chu keimah pawh ka inhuat em em na chu a ni. Nep ka inti bawk, chutiang taka ka thinlung min la thunun chu ka duh lo.

 

Chaweikhamah rei vak lo kan thu khawmuang leh a, Nutei nu leh pa chuan tihtur an neih chhuanlamin room lam min pansan ta daih a, Nutei nen chuan kan thu ta ran a. Engemaw chu sawi ka duh, bul tan dan ka hre si lo. Ani lah chu a ngawi ngal mai si a, thil tam tak a ngaihtuah niin ka hre bawk.

 

“Rawn zin thla ve la” ka han ti chhuak tawp a.

 

“Min mikhual peih lo ang” tih pahin a nui ve ta hram a, ka awm a tinuam deuh sawt.

 

“Engtia awm zel nge I tum deuh?”

 

“Hnate hi ka zawng ve tawh mai dawn mawni ka tia, ka pa hian zir zawm tur hian min duh viau na a, kei chuan ka duhtawk viau tawh” a ti a, ka lo bu nghat. A thutnaah chuan ka va insawn phei a, engkim hi sawi fel a ngaiin ka hria.

 

“Nute, thil pakhat hriat chian ka duh” ka ti tawl a.

 

“Min zawt la”

 

“I tan hian enge ka nih?”

 

“I hre miah lo tak tak nge min fiah I tum?”

 

“Chutiang lam a ni lo. Min hmuh dan dik tak han sawi teh”

 

“Joseph, ka rilru hi chu I hrechiang viau turah ka lo ngai asin. Ka duh che tih ka sawi hmasak ber atang khan ka rilru hi a la inthlak ngai lo. Kan tleirawl tirh atangin Mala hian min beisei tawh a, mi hausa chhungkua an nih vang hian ngaihzawn let ve pawh ka tum ngai lo. Mahse, ka rin aiin a peih rei a, min zuiin min nghak ta zel a, nang hi hmu lo in tawng lo t ache ila chuan ani kha ka khawngiah vangin ka kawp tawh ang. Khawngaih vanga nei tam tak pawhin an hmangaih chhunzawm thei tih an sawi hi ka hre fo tawh thin a. Risk lak ka tum ve ta kha a ni a, I lo lang a, ka theihnghilh thei ta si lo che a. Nangmah duh reng chunga Mala kawp kha ka thei ta lo a ni” a ti a. A kut chu ka hum vang vang.

 

“Mala chu kawng engkimah ka tluk lo asin. Ani I neih chuan I nuamsa zawk anga, ka pek theih loh che hi a pe thei bawk ang che. i hriat angin ka thinlungah hian Dinpuii beiseina hi a la thi thei si lo a, tihnat che ka hlau, chuvangin risk hi ka la ngam lo a ni” ka ti a.

 

“Ka nghak thei che alawm” a ti a, a mittui chu a rawn luang ngiai a.

 

“Nute, a awlsam dawn lo. Mala hian beidawnsan chein midang lo nei si sela, Dinpuii ka hnenah lo kir bawk sela, engtin nge ni ang?” ka ti a.

 

“Ka tana ruat I nih loh pawhin Mala chu ka kaltir tho ang. A fel a, min hmangaih tih pawh ka hria. Mahse, khawngaihna vang ringawt chuan ka nei thei lo ang. Ka phu lo a, amah hmangaihtu tak a tawn theih nan ka kaltir ang” a tit a a.

 

A kut chu ka hum nghet ngang mai, mi rilru nghet zet a nih vang hian a thusawi ang chuan a ti tak tak ang tih ka hria.

 

“Ka bulah chuan I hlim tak tak dawn chuang em ni? Ka thinlungah Dinpuii a awm tih hre reng chung chuan?” ka zawt lo thei lo, min beidawnsan se ka tih vang a ni pakhat.

 

“I thinlung chu ka thunun rual a ni hleinem, I taksa in min phatsan a nih ngawt loh chuan ka pawm vek ang” a ti a.

 

Chu chu Nutei nen bul kan tan tak dan chu a ni. Kan hma hunah hian eng tak tawk chho ang maw? Engpawhnise, hetiang khawpa min duh vetu han thlauhthlak tawp chu a harsa ve bawk a ni. Ka hlauh ber erawh chu amah tihnat hi a ni a, chuvangin Dinpuii hriatrengna pawh zawi zawia paihbo ve zel chu ka tum a, a taka kan intawn hunte rawn inherchhuak se, engtin nge ka thinlung hian a dawnsawn ang tih chu ka ngaihtuah buai duh ta lo law law. Kum hei leh chen a chanchin hriat tur awm miah loa insiam thei hi ka beisei loh hi a tha zawk tih chu ka inhrilh nawn a ngai ta fo mai.