DAWN 6

 

DAWN – 6

(story of my life)

 

“Enge I ngaihtuah vung vung a, I faten an biak che pawh I hriat theih reng reng loh?”

 

Ka lehkhabu chu ka khup thuk a, ka nupuiin mak tih hmel deuha min lo melh chu ka han en a, a piahah ka fate pahnih chuan min lo melh reng bawk a.

 

“Ka lu a nuam lo deuh alawm maw le” tih pahin ka lu chu ka han hmet nawk nawk a. “Enge min zawha Bawihte” tih pahin ka fate lam chu ka han hawi a.

 

“Nichin atangin ka be char char che a, min chhang duh lo a nih kha” Azualtei chuan a ti nang nang a.

 

“I pa hi tunhnai chu a migraine hi a chhuak nasa deuh a, lo hrethiam hram hram rawh u” tih pahin kan fate hmuh loh chuan min melh rum ram ram khawp mai.

 

Ka tho chhuak a, ka fate chu ka va kuah a, hmun dangah lehkha zirin an awm bo char char a, an rawn haw chhung reilotea ka laka vuina an neih hi ka duh lo.

 

“Car khalh kan zir dawn em niang vawiin chu?” ka tih chuan an nui ta var var a.

 

“Chu chu alawm nichin atanga kan dil che chu” ka fapa Sangtea chuan a ti a, hlim tak chuan room atangin kan inzui chhuak ta a.

 

Chhungkua kan din dawn khan keima tawkah ka inngaihtuah ve nasa a, thil pakhat ka tihsual chuan chu chuan min umzui reng tawh dawn tih ka hriat avangin hmanhmawh pawh ka hmanhmawh rum rum duh lo a, ka chhungten min nawr ve fe hnuah an thu ka awih ta kha a ni a, mahni inrintawk lohna a lo lian ve thin bawk nen ka nupui neih hma ni thleng khan ka ngaihtuahna hi ka hmang nawn kha ania, engmah thulh theih ni tawh lo mah se fim takin engkim ka chhui kilh kelh a, chumi hnuah tihsual neia inhre loa nupui nei ta ka ni. Kum 16 chhung chu chhungkaw hlim leh inkawmngeih em em niin kan khawsaho tawh a, mite pawhin kan chhungkua ang hi neih ve an chak thin thu min hrilh ve nawlh nawlh fo. Keipawhin chhungkaw din hlawhtling ka inti ve thawkhat a, chutiang a nih reng lai chuan kan chhungkaw chungah chhum dum in thla a rawn zar ve tan feih feih a lo ni reng a, ka theihna leh inthunun theihnain a vai kian rual lah chu a ni si lo a.

 

Nilengin ka fate chu motor khalh ka zir tir a, Sangtea phei chuan a khalh thei nghal mai, bike a lo khalh thiam sa bawk a, a harsat lem lo. Azualtei chuan a han ti ve lauh lauh na a, a kumin a la phak lo nasa deuh bawk nen a beidawng ve deuh mai. A u in a khalh vel chu phur em em hian a lo au vel thin a, an unau hi an inkawmngeih bawk a, hmuhnawm ti takin ka lo thlir ve dauh dauh.

 

“Apa, vawiin hi anu birthday a ni lo mi?” Sangtea’n a ti chhuak thut a, a nau nen chuan phawk zet hian kan melh dun a.

 

‘Engtinnge ka theihnghilh theih?” tih pahin Azualtei chu ka han hui a, motor lamah hmanhmawh zetin kan inzui lut a.

 

“Anu chu a thinrim ngawt ang. Tukinte khan a hlim lo ka ti reng a ni” Azualtei chuan a ti a, engmah sawi tur pawh ka hre lo, ka inthiam lo ngawih ngawih.

 

Ka phone chu ka phawrh chhuak a, ka thianpa Dona te hotel ah chuan room ka book a, dinner ka ei chhuahpui tawh mai a ni ang chu. Ka phone a rawn rik chuan ka pickup vat a, a lungawi lo ber tur leh thinrim tura ka ngaih ka nupui duhtak chuan tawngkam dam zet hian a ban tawh thu leh lam tura min duh thu a rawn sawi a, ka inthiam lohna a zual sauh.

 

Hospital lamah chuan kan inkhalh phei a, kan va thlen chuan gate bulah a lo ding tawh a, ka fate chu kan plan kha engmah hrilh lo tur leh a birthday kan hriatchhuah thu sawi miah lo turin ka ti a, kan boruakin a zir lo ta sa sa, surprise letling ila a tha ber dawna ka hriat vang a ni.

 

“Sangtea chuan hma a sawn em?” a rawn thut luh hnuah chuan a han ti a.

 

“A khalh thiam nghal vek a, keipawh min phur nghal alawm” Azualtei chuan a lo ti.

 

“Chawhmeh bazarah I kawi lawk ang u, zanin chu thil tui deuh keimah ngeiin siam ka duh tlat” a ti a. Tlemin titau aw a tel tih ka hre ve reng.

 

“Tlaiah chhuahna tur kan nei a, kan hman tawh lo ang” ka lo ti vei hmuk a, ani a lo thaw hak thung.

 

In kan thlen chuan hmanhmawh zet hian a chhuk a, ka fate chu an lo then tha mai.

 

“Apa, a thinrim tak tak chuan a mood a dik leh har dawn sia, va hrilh tawh mai rawh”Sangtea chuan a ti a, a nauin thlawp zet in a lu a lo bu nghat nghat.

 

‘Anih chuan motor hi lo hung tha ta che, fimkhur deuhin aw” ka ti a, ka kal ta a.

 

Roomah ka lut tlang a, khumah chuan ka nupui chu a lo thu a, kan fate hmaa a inthupna zawng zawng kha a awm tawh lo.

 

“Vawiin hi eng ni nge I hria em?” a ti ram hmak a.

 

“Aw, Saturday” ka lo ti.

 

A tho lawk a, a pheikhawk a phelh a, ngawi rengin a thawmhnawm a hlip a, towel banin bathroom a pan vut a, a banah ka lo chelh hman hram.

 

“Enge?” a ti hlar a.

 

“Happy birthday ka nupui duhtak” tih pahin a hmuiah ka han fawp a.

 

“Engtikah khan nge I hriatchhuah?”

 

“Ka theihnghilh hleinem”

 

“Dawt chu sawi lo mai teh”

 

“Ka tihpalh aw, I birthday tih ka hriatchhuah har vangin, a thleng nawn tawh lo ang” ka ti a.

 

“I theihnghilh hlen dawn emaw ka ti tawh asin” a ti a, tunah chuan a hmel hmuh a nuam leh deuh ta. I birthday a ni bawk a, inbual tlang teh ang” tih pahin ka pawm lawp a, bathroom lamah kan lut ta a.

 

Dinpuii nena kan inneih khan engemawti chhung kha chu khaw khatah zel kan thawk thei a, tun hnuah hian awm tlan theih loh kan nei ta fo a, tunah hian keipawh Champhai lamah SP in ka awm mek a, ka nupui erawh Civil Hospital Aizawlah a thawk ta thung. Awm hrang ngai lo kan han awm hrang kha a tirah chuan insiamrem harsa kan ti a, nutling leh patling pui tawh kha kan inngaih lutuk vang khan kan inhau ve fo. Tunah erawh chuan kan hna in a ken tel tih kan pawm thiam tawh a, tin, Aizawl lama awm leh vat tur ka ni tih kan hre bawk a, hrehawm kan ti lutuk lo. Hetiang a nih mek lai hian a ni ka awmna hmun Champhaiah Nutei nen kan intawn leh a, ka nupui fanaute nen kan awmho reng lai pawha ka ngaihtuahna a lo vah bo leh thin.

 

Engtin nge Nutei nena kan inthen a, Dinpuii nen kan intawn leh tih hi in hriat chak ka ring, tun thleng hian ka nuna hmeichhe pahnih ka tawn ve chhunten ka tum loh dan hlira min kawihher dan hi mak ka ti thin. Nutei nen kumhnih kan inzui hnuah inneih zai te pawh rel thain ka hria a, ka sawi pui nghe nghe. Ani pawhin min hnialna a nei lem lo a, keimah hi insawn mai thei dinhmuna ka ding avangin chumi ngaihchan zet a, inneih chu ka duh a ni. Ka chhungte bulah ka sawi a, anni pawhin min phurpui ve khawp mai. Chutianga mihring lam atanga ka inbuatsaih ruk ve mek lai chuan Nutei an ru bo a, a ru tu pawh Mala kha a ni tih thuin min rawn deng chu mihring beiseina hi a lo bo hneh thei khawp mai. Dinpuii nena kan inthen khan ka tuar viau khan ka hria a, tunah chuan inneih thlenga kan lo sawi ve tawh vang nge a letin ka na a, ka zak bawk. Ka tlawm vawng vawng mai hian ka hria a, dam chhan tur awm hian ka hre lo. Hetianga mualpho kher lo hian engati nge Mala nen inkawp tura ka tih lai khan a duh mai loh? Engati nge kei kha min hmangaih ber anga min thlan si? Zawhna tawp thei lo chu ka chhan theih ni miah si loh khan ni tin zan tin ka inzawt a, chhanna min petu tur ber lah chu ka hmuh phakah a awm si lo. Engvang maha a chanchin hriat nawn chu ka duh lo a, ka duh ngai bawk lo ang. Ka chhungte hnenah thil awmzia ka sawi a, a hming vawi khat mah lam lo turin ka ti. Ka nu mittui luang kha a phu ka ti lo a, ka mittui phei chu a phu lo lehzual. Rilru nat kha thinrimnaah a inlet a, amah ka hriatchhuah theihna tur thil reng reng chu ka hal ral vek a, ka nunah hian tel tur tumna ka nei tawh lo.

 

Kolasib atangin Aizawlah ka insawn chho tawh a, nunphung pangngai zawh tumin ka bei ve fat fat a, hmeichhia hian ka rilruah hmun an chang hlei thei ta lo chuan ka nu rilru a ti na a, min nawr a duh lo a, min nawr mah se awmzia a nei dawn lo tih a hria te pawh a ni ang. Ka hnaah ka inpumpek tawp a, engmah thil dang hi ka nunah a leng lo. Inkhawm chakna te, tumna te hi ka nei lo hrim hrim. Ka nung ve tawp a ni ber mai. Ka nu leh pa hian zu ka in tih an hriat ka ring lo a, a rukin ka lem ve thin tih hi tuman an hriat ka ring lo. Nutei’n min phatsan hlim khan awm ngaihna ngang ka hre siloa, zu ka in ve ta ringawt kha a ni a, sim tange ti lem loin vawiin thlengin ka in ve ta zel a nih hi. Ka in tam ngai lo a, zan mut dawnah bak ka in ngai hek lo. Zan mut hi ka hreh thin em avangin a tih chi riauin ka hria a, ka ching ta zel chu a ni ber. Tin, hetia ka in hian ka rilru ipik lutuk te hi a kiang ve huai hian ka hre tlat a, min hnem theitu ber nia ka hriat chu ka chhunzawm zel a ni.

 

Tlai khat ka office bang chu sikulpuikawnah Dinpuii ka hmu a, ani pawhin min rawn hmu tih hriat zet hian a tawng lai chu a tawp chawt a, min melh reng a, an dinna bul kan han thlen chuan kan hmaa motor tlan chu a motor a thi a, kan han nghak rih a, Dinpuii dinna leh kan dinna chu inhlat lo te a ni.

 

“Kan doctor chu I dam maw?” tiel aw lek lek hian ka va ti a.

 

“Aw, dam e” ati sap a, a thiante chuan min lo melh tawn sek.

 

Tawng leh ka tum lai takin kan hmaa motor chu a tlan chhuak a, keini pawh kan tlan ve a ni nghal mai a, ka thusawi tum chu ka thulh thei ta hlauh. Mahni leh mahni ka intimualpho tep a ni tih ka hriat chuan kan tlan chhuak hman lo ang tih chu ka hlau hnuhnawh khawp mai. Mihring sual ru ve tak mai hi ka ni a, zanah Dinpuii te ina len chu ka tum khawp mai. Min then chhan hre loa damchhung hman hi ka tum miah lo, chu chu a tir atanga ka rilru kha a ni. Chaw eikhamah muangchangin ka inbual a, mut dawnah chauh in thin khan zu chu ka han thli chhuak a, ka lem ta pawp a, ka thin a sa thla hat hat. Hmeichhe pahnihin tlawm theihtawpa min siam avang hian ka chhungril hi a dam thei lo a, sual chakna in min tur ut ut ti ila ka sawi sual lo ang.

 

Dinpuii te veng lamah ka inkhalh chhuak a, nidang aia zu ka lem hnem vang ni maw, ka thin chu a tawtin a ipik churh a, meizial chu tannin ka han hip vang vang a. An in penna laiah chuan lung an lo rem that avangin motor a kal thei lo, ka chhuk a, ka motor ngheng chuan ka zial chu ka zu vang vang phawt. Engvanga helaia kal duh kher nge ka ni tih chu keima thinlung fim zawk chuan a ngaihtuah a, mahse, ka chapona in min nawr kal tho.

 

Kawngka ka kik a, thawm a awm mai lo, a aia ringin ka han kik leh a, lut tura min rawn chhawn takah chuan ka hawng a, Dinpuii te chhungkua chu an lo awm kim thap. Min hmuh chuan an lo phawk hlawm kher mai, amah Dinpuii tak pawh chuan mak ti zet hian min lo en a.