DAWN 7

 

DAWN – 7

(story of my life)

 

“Engtinnge awlsam deuha min kalsan theih?”

 

Dinpuii chu a kun ngal a, ka thil in chuan hna a thawk tha tawh a, ka dawhthei lo hle.

 

“Nangpawhin awlsam deuhin midang I nei leh thei mai alawm” a lo ti khauh.

 

“Awlsam deuhin a? “ ka nui hak a. “Nangmah ang mai maiin min ngai suh aw” tih pahin a banah chuan ka han herh deuh a.

 

“A na ania” tih pahin a ban chu a lasawn a, ka tha hi a za zek zek a ni ber.

 

“Tunge keimah aia I thlan chu? Khawi maw a thlalak te ka lo en ve” ka ti chho a, ka in thunun thei lo chho mek chu a ni.

 

“Ms, I van mak tawh em em! Hetiang hi I nih theih ka ring ngai lo asin” a ti ta sap a.

 

“Keipawhin ka inring bik hleinem. Hetianga ka awm chhan hi ngaihtuah la, inthiam lohna te I nei em?” ka ti a.

 

“Keimah vangah chuan puh lo mai teh, ka tello e” a ti ta hmak.

 

“Nangmah vanga thil thleng chho vek a nih hi”

 

“Ms, va haw phawt teh, hetiang rui chunga indawr hi ka duh lo a nia” a ti ta a.

 

“Nia, ka haw ang. Ka haw em em ang, min mamawh lo tu hi ka mamawh bik hrep lo che” tih pahin ka tho a, a rawn tho ve nghal a. Ngawi rengin pawn thlengin min rawn thlah a, “Mangtha aw” a tih chu chhan pawh ka chhang lo.

 

In ka thlen chuan ka thaw a ipik churh a, ka zu dah that chu la chhuakin in leh mai ka han tum a, mahse, thil pakhat ka rilruah a rawn lang zawk. Hmeichhia vanga ka nun hloh mek hi thil tul lo tak, mahni intihchhiatna a ni tih ka ngaihtuahnaah a rawn lang fiah ngang mai. Tukverh chu hawngin zu chu ka paih ta daih a, hlimna min pe emaw ka tih leh ka rilru hahna min chhawk emaw ka tihte khan ka ruih lai chiah a daih tih ka hria. Ka harh fim laiin a aia nasain ka rilru a buai thin a nih kha, chuvangin ka kalsan tur a ni.

 

Thla hnih a liam leh hnu chuan mak angreng takin Dinpuii chu a rawn lang hlawl a, office chawlh a ni a, a duty zo rawn kawi a nih hmel a inchei dan atangin. Keimahin inah ka awm a, kan kawmthlang huana hna ka thawh laiin huanah chuan a rawn kal chhuk a, ka lo melh hu ringawt.

 

“Enge I rawn tih dawn?” ka ti deuh hmuk a, a hmaa min hnawh hawn avang khan                  hi a la reh thei lo.

 

“Ms, thil engemaw sawi pui tur chein ka lo kal a nih hi” a ti a.

 

“Aw, sawi la” ka lo ti leh mai a.

 

“I thawh zawh hi ka lo nghak ang che” a ti a, ka zawh ngial pawhin engmah a sawi duh lo. Min nghak ve reng bawk si a, hnathawhsan reng thu awm bik hek lo, in lam panin kan inzui chho ta nge nge a.

 

Ka inbual a, ka hmanhmawh duh lo lui ve ngat. Ka zawh chuan min lo nuih deuh var var a.

 

“Mipa ka hriat tawh ah chuan inbual rei ber I la ni ang” a ti a.

 

“Mipa engzat nge I hriat?” ka lo ti leh kher, a nui lai a tawp chat a, beidawn hmel angreng tak hian min melh.

 

“Ka roomah rawn lut mai rawh” tih pahin room lam ka pan nghal a, ka hnungah min rawn zui ve. Ka inthlak chhungin ka khum bula chair ah chuan a thu a, dawhkana ka lehkhabu chu a lo bih a.

 

“Enge I lokal chhan chu han sawi tawh ta che” tih pahin khumah chuan ka thu a.

 

“Bul tan that leh nan ka tlai tawh em?” keimah pawh min melh loin lehkhabu chu a bih tlat a.

 

“Chu chu a awlsam viau I ring em ni?”

 

“Ka rin loh vangin ka zawt che alawm”

 

“Dinpui, khatiang mai maia awm leh tur kha chuan engmah ka peih tawh lo” ka tih chuan ka thutnaah a rawn insawn a.

 

“Keima hma ka lo sial em a ni, min ngaidam hram rawh” a ti a, a mittui chu a tling deuh pam a.

 

“Chutia awlsam deuha sawi fel theih a ni angem ka hrethiam lo, thil tam tak a inkarah a lo tla zep tawh si a” ka ti a, ka rilru tak tak a ni. Amah Dinpuii ka duh tawh loh vang ni lovin, ani lamah pawh nise keima lamah pawh nise nakina kan sawichhuaha kan rilru tina tur thil a nih dawn ai chuan bul tan that loh hi a fuh zawk ka rin vang a ni.

 

“Kei chu ka inngaihtuah fel tawh a, nangmah I pawimawh tihna a nih chu” a ti a, “Min ngaihdam theih tawh loh pawhin sawi hreh lo la, ka pawm vek ang” a tih zawm a.

 

Engmah sawi loin ka lamah ka han pawt hnai deuh a, a hmui chu ka fawp ta vawng vawng a, amah zawk hi ka tana ruat a nih avangin Nutei kha min lak sak ta pawh a ni maithei tih chu ka ngaihdan nghet tak a ni ta. Kan inthlahlel ve ngang a ni ang, kan inthalh hlei thei lo. Ka lo duhthawh ta deuh pawh a ni ang, min rawn nam tang tang a, ka lo khi deuh suk.

 

“Ms, bul tan leh ka duh vang hian I laka inpek ka tum tihna a ni miah lo a nia” a tih chuan ka harh chhuak thut a, khumah ka lo bawh bet reng tawh hi a lo nia. Ka tho chiang kher mai.

 

“Engmah tih ka tum hleinem” tih pahin ka tukhum thak lo pui chu ka han hiat a.

 

“Hawh, min thlah rawh” tih pahin a kawr chuar chu a han pawt mar zung zung a.

 

Hun rei tak mihrang anga lo awm tawh leh mahni kawng ve ve zawh hnu te chuan bul kan han tan tha leh ta nih chu. A chang chuan hlauhthawnna ka nei leh thut thin a, inneih kan tum lai tak te hian Nutei ang bawk khan min kalsan leh mai anga tih mai maite hi ka ngaihtuah thin a, inneih hi ka hlau ta deuh tlat ti ila ka sawi dik ang.

 

Ka chhungten inneih min nawr chho tan a, kei erawh ka ngaihtuahna a buai telh telh a. Dinpuii sawi pui ka tum chang pawh hian ka thulh leh thin, ka inhrethiam tawh bik lo. Chutianga kum a vei leh meuh chuan engkim hi risk lak a ngai tih ka hria, ka chhungte hnenah palai kal ka remti tih ka sawi ta nge nge.

 

A tawi zawngin sawi chho mai ila, chumi hnu thla thumnaah Dinpuii nen kan innei a, ka tana hmeichhe thianghlim ni tura ka ngaih kha ka rin leh beisei ang a lo ni hauh lo. Ka na nawn leh ta vawng vawng mai anih chu. Ka rin lawk deuh ni mah se a taka ka tawn chuan ka na leh tho sia, mihring hi chu aw! Mahse, vawi khat bak a rah tleuh ka ring lo, mipa tam tak phei chuan an hre lo lui theiin ka ring. Mahse, keimah ah hian thil chiang lutuk a awm miau a, ka hai der thei ve lo thung. Tin, mahni tawkah ka invawng ve bawk a, chtuiang tua ka beisei ruk vang bawk a ni mahna.  Chumi avangin a laka rilru chhia put chhunzawm erawh ka tum lo. A tirah, bul kan tan leh dawn khan ani ngei pawhin nunhlui a nei a, a nunhlui phumbosak turin min ngen a, ka remtih hnua bul tan leh ta kan ni a, heng hi chu a nunhlui a ni, ka hriatsak reng tur a ni lo tih chu ka intiamna a ni.

 

Kum 16 kaltaa kan nupa nunah khan inthen duhna tur khawp leh chhungkaw nghawng khawp harsatna kan insiam lo a, kan tlin lohna pawh kan inhrethiam a, a tira ka tui loh ai khan Dinpuii lahin chhungkaw nu nih a tlin a, ka lawm loh a hlauin ka tan a inpumpek vek a, a thil sual pakhat tih kha hnualsuat nan ka hmang ngai lo. Ka theihnghilh sak ka tih chuan a dik chiah ka ring lo, ka haider sak thei ti ila ka sawi sual lo ang. Amah chiah mamawh turin min siam thiam a, hmeichhe dang hian ka nuna hmun an chang ngai lo. Kan awm hrang ve fo a, chungah pawh chuan hmeichhe nasa ve fe fe tawn chang pawh ka nei, ka nupui min hip hneh vang pawh a ni mahna, khaw dang ka hawi chuang lo. Chutiang a nih mek lai chuan Champhai lamah SP hna chelh turin ka kal a ngai a, nidang leh tum danga ngaihthat lohna nei ngai lo leh engmah sawisel ngai lo Dinpuii chuan a hreh em em a, ka kal lohdan tur chu a ngaihtuah reng a, ka awm dawn tih kan hriat atangin mutmawh hnar mawh ah a nei tlat a, kei lahin eng hehuah ka lo ngai lem lo a, ka lo nuihsan mai mai thin. Hmeichhia hian thil engemaw tak hi an lo hre thei tak tak pawh a ni mahna, Champhaia ka awm kum hnihnaah chiah ka rin loh leh beisei ngai miah loh thil a rawn thleng tat lat.

 

NUTEI KHA…

DC in Head of department zawng zawng meeting pawimawh tak a koh avangin keipawh hun tiam thlen hma minute 10 la awma thlen hman tumin ka chhuak a. Nidang aiin khua chu a dur deuh a, boruak pawh a vawh deuh sung hian ka hria. Office-a ka awm lai khan chutiang tak pawhin ka lo hre lem lo, pawn lam boruak chu a lo danglam ve deuh a nih hmel. DC office kawtah dingin mi awm lohnaah chuan meiziak ka tan a, tlemin kan thleng hma deuh a, khua chu ka chuan pah a, phai lam hring dap mai chu ka chhungte hmuh veah ka it khawp mai. Ka dinna piah lawkah motor a rawn ding a, ka va melh zawk a, ka hawisawn leh mai a, hmuh nei tlata ka inhriat avangin ka hawi tha leh ngat a, chutah ani pawhin min rawn hmu ve ta chiah, khaw dang a hawi sawn mai thei bik lo a ni ang, min melh ve ta reng a, Nutei, Nutei kha  ni. A motor chuanna chu ka melh tha leh ngat a, SDEO (Sub- Divisional Education Officer) tih a lo chuang kalh. A hmel chu a zahawm ngaiin a la zahawm reng, tlemin a lo lang upa ve ta deuh tih mai lo ah chuan a hmel chu la tha var var tak a ni.

 

Biak ka han tum deuh lai chuan a kal ta daih a, a hnung deuha ka kal ve ta ringawt. Meeting lai te chuan amah ka lo melh leh thin a, ani erawh chuan ka awm ve tih pawh a hre lo ni maiin ka hria. Kan ban hunah chuan ka va be awm e aw ka ti rilru a, Dinpuii chhuahchhal anga chhal kha ka tum ve pawh a ni chuang lo. Tin, ani chu pasal nei a ni a, a duh zawk a nei a ni mai a, engmah sawi theih ka nei reng reng lo.

 

A motor bulah ka ding a, ka biak hma chuan a kal bik awm lo. A rawn phei ta zan zan a, min pumpelh thei ta bik lo.

 

“I dam tha maw? Hetah in lo awm ve reng a lo nia” ka han ti a.

 

“Ka dam e, ni e, hei ka awm ve anih hi” a ti a, a tawngdanah chuan min lawm tehchiam lo tih ka hria.

 

“Quarter ah em ni in awm a? Fate engzat nge in neih tawh?” inhmelhriat, inhmu leh inbiakin ka bia a ni.

 

“Joseph, ka chanchin engmah I hre lo a nih chuan engmah min zawt suh, nangni ang ho vang hian asin mi tam tak hian midang an rin theih tawh loh” a ti ta hmak. A dik lo zawkin a tuartu zawk hi thiam loh min chantir a ang riau. Ka nui lui suk a, “Ka rawn la leng ang, inpa pawh rawn kawm ve a chakawm alawm” ka ti a.

 

“Hriata, kal ang” tih pahin a driver lam chu a hawi a. Ka dinna chu tlemin ka tawlh hnung deuh a, a chuang lut ta. Keipawh muangchang tawh loin ka motor lam ka pan a.

 

“Sir, I hmelhriat em ni nichina I biak kha” Lawma, driver chuan a ti a.

 

“Ka thian hlui a nih kha” ka lo ti mai a.

 

“A vanglaiin a chhe lo ang chu aw, pasal nei loa awm atan chuan a uiawm ngawt mai” a tih chuan ka beng a verh zawk.

 

“Pasal a nei lo amaw? Hmanah khan a nei tawhin ka hre tlat” ka ti a.

 

“Nula hnahkhat ngat an tia lawm, min han duh se chuan tunah pawh ka la iai lo mawle” a ti zui lehnghal a, engmah sawi tur ka hre tawh lo.

 

(Ads click, click.....)