DAWN

 

DAWN

(Story of my life)

 

Ka lehkha hlui biha rei fe ka thut hnu chuan ka phone a rawn ri ral ral a. Ka nupui duhtak in min rawn biak a tum a lo ni. Rang fe hian ka han pickup a.

 

"Enge i awmzia? Hei ka nghak char char che ania" a tih chuan ka phu zawk a, ka sana ka melh nghal a, dar 6 a lo ri lek lek tawh. Ka chek hlak a.

 

"Ka lo kal dawn chiah e, ka tihpalh lutuk" tih pahin phone ka dah a. 

 

Vawiin hi kan inneih cham vawi 16 na a ni a, kan fate an awm lo bawk nen dinner ei chhuah kan tum a, keilah chu nunhluiah letin ka suangtuahna ka lo kawm mial mial chu ania, a hun lo tak zet a ni. 

 

Ka inbual hman tawh loh avangin ka hmai chu ka tuai fai a, ka nupuiin ka thawmhnaw hak tur khuma a dahchhuah sa chu ka ha mawlh mawlh a. Hmanhmawh baklengin min nghahna hmun panin ka inkhalh chhuak ta nghal a. Ka thaw a sa phat phat mai. Hei leh chen hi kan innei tawh a, vawiin ang ema ka nupui ka theihnghilh chian hi a la awm ngai lo. Ka luka thing nawk nawk a, ka damchhung hian ani chiah hi ngaihpawimawh ka duh a, ka duh reng bawk ang.

 

Ka va thlen chuan a lo tum deuh bar a, ka khawngaih zawk. 

 

"Sorry" ka ti sap a. Min melh ram ram mai.

 

"Kan anniversary boruak tihchhiat ka duh loh vang chauhin ka ngaidam ang che" a ti nghat a, ka lo khi suk.

 

Chaw kan ei zawh chuan muangchangin kan inzui chhuak a, ka banah vuanin nghet zet hian ka kut a hum a. Kan boruakin a zir ta chiah lo bawk nen kan thil in present tur pawh ina in pek kan tita kha ania, ka kut a vawn lohna lam chuan ka ipte chu ka dap a, ka pe thut zawk dawn nge mawni ka ti rilru a, ka insum leh ta zawk.

 

In kan thlen chuan ka in tleuh thuak a, ani erawh kan fate room ah chho tlangin an rawn haw hun huna an hmuh atan present kan lei sak chu a han dah a. Kum 16 chhung zet kan innei ve ta reng chu a nia, hun hi a kal chak mange!

 

"I zo dawn tawh em?" Tih riah chuan ka harh zawk a, in tleuh zawk tum kha ka lo awm rei leh ta fe mai. Vawiin chu ka dik thei miah lo chu a nih ber hi.

 

Bathroom atanga ka chhuah chuan khumah a lo thu a, mitmeng de sawr hian min melh a, hetianga min melh tawh hi chuan ka tuiral lo chauh a ni e. A thutna chu pan ding nghalin a biangah ka fawp a, "Happy anniversary" ka ti sup a.

 

"Hetah pawh" tih pahin a hmui chu a kawk a.

 

"Dawn chiang lutuk" tih pahin a hmuiah chuan ka fawp a, chin tawk ka hre leh ta lo.

 

"Tawk rih rawh se, hun kan ngah" tiin a nui ri hak a, ka awmah min nem pah deuh a. Ka inla hrang thei hram.

 

 

Kan bawm thuhruk ve ve chu kan han inpe a, hawng hmasa tura ka tih chuan phur zet hian a hawng a. A meng bial nghal kawk, car chabi chu phawrhin min melh ran a, ka surprise mah mah a ni maithei.

 

 

"Ka hmangaih che" tih pahin min rawn fawp a. A hmel chu a nung siah a, ka lo thlir dauh dauh.

 

 

"Ka thil pek che a iaiawm phah sawt" tih pahin arawn kawk zeuh a. Nui chungin ka han hawng a, sana nalh zet mai chu ka phawrh chhuak a, sana lawm em em reng tan chuan a a hlu tih loh rual a ni lo.

 

"Ka lawm e" tih pahin a chalah ka fawp a, ngawi rengin engemawti chhung chu kan thil dawn chu kan thlek dun a, kan lung a awi tih a hriat hliah hliah.

 

Chumi zan chu kum 16 kaltaa kan zan hmasa ber ang maia hlim leh lungawi chuan hun kan hmang a, kan damchhung hian hlimna tawp thei lo chan ka duh a, ka phak ang tawkin hmaih loin chung lam hnenah pawh ka dil thin. Harsatna erawh pumpelh vek ka inring bik lo, kan tawng ve zel reng bawk a, ka hun liam tawh leh ka nunhlui khan min bawh buai tawh lo se tih hi ka duhthusam ber chu a ni.

 

 

INTAWN VAWIKHATNA

 

"Joseph Malsawmkima" tih rualin ka chungah mit a fu nghal thup a. Hawi chhuak tha ngam loin kan sir bulah chuan ka ding kawi sawi ta reng a, laklawh thil thua school sawn ka nih thu velte sawiin ka classmate turte bulah min in introduce mek a ni. Chumi hnuah tlar hnuhnung bera thu turin min tir zui nghal a, ka school luhna hmasaa ka huangtau tehlul nen hetah chuan ka kimki ve tak zet a ni. 

 

"Khawi school atangin nge i lo insawn a?" tia min zawttu ka hmaa hmeichhia, mitmeng lian bial kalh chu ka melh a, a bula a thiante chuan min rawn en ha hlawm bawk a.

 

"Ah.. St Anthony's" ka ti thawp sat a. 

 

"Dinpuii ka nia, hei Arini, hei Duhawmi" tiin fel tak hian min hrilh thlap a. "Engtinnge kan koh ve dawn che?" A tih zawm nghal a.

 

"Joseph min ti awm a, Joe tia min ko an awm bawk a, in duh duh dan a ni mai" ka ti a.

 

"I Mizo hming a mawi tehreng nen" Dinpuii chuan a ti zawi sap a, inthiam loh hmel deuh hian min en nghal bawk.

 

"Ka pu hian Bible name hi a ngai pawimawh lutuk a, a tute ho chu min puttir deuh vek a" nui chung hian ka lo ti a.

 

"Sorry" ti leh sepina nui a, a hmelthatzia ka hmu thiam chiah.

 

Chu chu Dinpuii nen kan intawn vawikhatna a ni a, kei mithar satliah ve mai min kawm tlangnel hmasabertu leh school nuam ka tih chhan ber chu amah a ni chhunzawm nghal bawk. Kum khat chhung chauh school lut tlang mah ila, ka damchhung kawppui atan hemi hunlai hian ka lo thlang daih tawh. Mahse, chuti maiin ka ta a ni thei dawn lo tih erawh ka ngaihtuah thleng pha ngai lo a, chutiang turin ka duh thu lah ka sawi ngam hek lo. A ruk takin amah hi ka duhin ka lo hauh ve em em ringawt mai a nih chu!️

 

A tawi zawngin sawi mai ila, class xii exam kan zo a, Dinpuii nen coaching centre inangah kan han kal tlang leh a, chu chuan amah nen min pawt hnai zual a, ni tin a kianga hun hmanhlel reng rengin zan ka hmang ral thin.  Zirlai thil pawimawh kan inzawt tih loh ah chuan phone hmang hian kan inbe khat khawp mai. Chutihrual chuan sunday zan hian a inthlahdul ve deuh thin a, darkar khat te kan in text ve thin. Hun vawng thlap chi a nih avangin chu aia rei erawh kan inbe ngai lo thung. Khan lo tak chungin ka mangtha a ngai thin a, zirlai atchilh tlut chi a nih vang hian a laka ka rilru puthmang hi a thawi pawhin ka sawi ngam lo, min hlat phah ang tih ka hlau!

 

Kan exam result a chhuak a, distinction class chu ka lo pha ve ngei, letter mark erawh ka hmu vek lo. Dinpuii chu Mizoram pumpuiah Science subject ah pahnihna a ni a, ka va lawmpui ve nghal zat a.

 

"Ms, (ani hi chuan heti hian min ko tlat a) chapo min ti lo la, ka rilru hi a na deuh a. Class a min tluk ngai miah lotu aia han tihchhiat chu" tiin min rawn reply. 

 

Hei hi chu ka rin lawk a ni hrim hrim a, mahse chutiang zawngin ka sawipui duh lo thung.

 

"I thiamzia kan hria a, nangmah i inhrechiang bawk a, a  bak a ngai a mi?" tiin ka chhang.

 

Rei vak lo hnuah a message a lo thleng leh a. 

 

"I chhanna hian min hnem ber e, ka lawm e" tiin.

 

Ka nui var var a, vawiin chu coaching class kan chawlh avangin inhnuai lamah ka nu pangpar ka chawi sawn pui a, hah viau e tiloin Dinpuii vangin ka hah pawh ka hrechang lo. 

 

Tlaiah rin loh takin ka u te chhungkua an rawn thleng thut a, min surprise an tum chu a hlawhtling viau. Anni hi an hna avanga Shillong lama awm an ni a, an pa hi bank manager a ni a, fapa leh fanu pakhat ve ve an nei a, an fapa pian hnua an rawn chhoh vawikhatna a ni. Ka result chhuah tlai a lo ni bawk nen ka pa in kan thenawmte arpui tui lai a lei a, kan ri ta chel chul a. Ka u pasal U Mama chuan an hnena awmtir chu a tum nghet khawp mai. Kei lah chuan tum dang ka nei ve ran si a, ka nu leh pa sawiah ka dah a, ka ngawi ta vel mai mai. 

 

Ka chau ve deuh bawk nen ka mu hma a, zanlaia ka harh chuan tukverh chu ka lo khar lo a ni ang, thli a rawn thaw lut heuh heuh a, ka tho a ka va khar ta nghal a. Ka mut a chhuak tawh lo hle lehnghal. Ka khum bula dawhkan inhung chu ka han tlawh a, ka lo tlawh na deuh nge a hnuai atangin album a rawn tla chhuak a. Ka mut chhuak tawh bawk si lo chuan ka han keu a, kan class thlalak chu la chhuakin ka bih vang vang a, thlir nin awm loh Dinpuii zawnah ka mit a fu leh nghal zat. Ka thaw hak a, henu hian ka rilru zawng zawng a luah khat vek chu anih hi maw! Ka rilrua awm zawng zawng hi ka hmuh leh hmasak berah ka hrilh ang ka ti thin kha a nia, ka hmuh hian ka sawi ngam leh thin lo. Midang tan ka phal lo tih hi chu ka hrechiang, ka tan pawh ka bei ngam chuang lo.

Ka u te an rawn zin khat bakah an cham rei thei dawn lo bawk nen class chu vawihnih lai ka kal lo, ka rilruah Dinpuii a awm reng thin a, amah hmuh chak vang hrim hrim pawhin class kal loh chu ka ui thin. Mahse, ka u te ka ngaipawimawh lo thei bik si lo a, nihnih chu ka hmu ta lo phawt, lehlamah tha tihna riau chu ka nei, ka laka a rilru ka hriat theih ka rin vangin. 

 

Class ka kal leh hmasak berah kei aiin a thleng hma a, a thutnaah ka kal tlang a, ka va thu ve nghal a, melh pawh min melh duh loa a tum bar chu ka lawm riau. A kut chu ka va tawk fuh lui kher a, min rawn melh run mai. Ka lo nuih sak a.

 

"Ka nuih a za lo e a" a ti. Chhang duh tawh loin ka lehkhabu ka bihsan a, a rukin ka va melh leh zauh thin. A tawpah chuan a insum thei tawh lo a ni ngei ang, "Enge engmah sawi loa nihnih lai i rawn kal loh?" tih pahin min rawn nghawk ta a, ka mit ka lo san ak ringawt.

 

"I sual ee" tih pahin min rawn nghawk leh a tum a, a kiu ah ka lo dawm a, ka kut ti che zeuhin a kut ka hum chat. A che tawh lo chiang ngei mai, keipawh ka thaw hle hle ringawt. Midang hriat hlau ru em emin ka kut chuan ka han kheuh pah zeuh a, min melh ngam lo a, a kut lah s tiche ngam tawh lo. Tifuh inti zetin ka hum nghet telh telh a. Chu chu kan pahnih bul tan a tawk em em a lo ni.

 

Kan bultan dan chu a naupang chhia hlein ka hria a, hlim erawh kan hlim chiang a ni. Thil sawi thiam lo chi ka lo ni bawk nen min beisei sang bik lo turah ka ngai a, ani pawh a awmdan ang ang hian ka duh a, ka pawm bawk. Exam kan zo a, result chhuah hma chu kan free ve ta bawk a, kan inhmu ngun malh malh viau. An ina len erawh ka ngam chiah loh avangin an dawr lamah ka kal ngun hle a, ani lahin dawr nghah a chuh ve chat reng bawk a. Han sawi let leh lawk ila, ka u te nupa khan an hnena awm tura min sawm kha ka hnial fithla thak hran lo a, entrance exam ka paltlang loh takin an hnena college kal chu ka tum ve reng. Ka document pawh ka kenthlak tir nghe nghe, Dinpuii erawh a zir chak em em doctor zir tura a tlin ka ring em em a, kan awm hrang dawn ngei tih ka chiang bawk a, kan hun neih ang ang hi am tak leh hlim taka hman ka duh a ni.

 

(Ka type khat tawh lutuk a, type tam thei ngang lo a ni e)