DAWN-10

 

DAWN – 10

(story of my life)

 

Ka nupui nen kan inbiak reng laite chuan Nutei hian ka ngaihtuahna a luah ngut ngut a, thil dik leh thil tha a ni lo tih chu ka hre reng, mahse, mipa nep tak ka lo nih vang pawh aniange, tunah khang khan min vaw let leh mek a ni si a. Hringnun hi a va harsain a fair lo titu tan chuan a fair lo thei dawn hle a lo ni. Keimah vanga tun thlenga Nutei’n pasal a la nei lo hian min tina a, pasal tal chu lo nei ve tawh se hetiang hi kan ni lo mai tur.

 

“Joseph, khawngaih takin min buaipui hi bansan teh, a tha lo” a ti nghat a. A kawngkhar bulah kan inhmachhawn ran a, tawlh let ka tum hran lo. ‘Mawh, a harsa zawng hian awm lo teh” a tih leh chuan ka pen hma hret a.

 

“Nute, ka tum loh I ring bik em ni? Ka tum ve nasa sin, mahse, ka hlawhchham a nih hi” ka ti a. Ani a lo thaw hak a.

 

“I nupui fanaute hmuh phak loha thil tenawm tih ka duh lo a nia” a tih chuan amah kalpelin a sofaah chuan ka va thu chawrh a, ka thaw chhuak ham ham,

 

“Tunah hi chuan ka nupui fanaute theihnghilh hrih ka duh” ka tih chuan tenawm ka inti, mahse, engmah hi ka hrethiam bik lo. Ka va melh chuan rilru nat hmel zet hian min lo melh ngar ngar a. “Nute, chutiang khawpa ngaihtuahna fim lo ka ni bik lo. Ka nupui uiresan khawp thil tih ka tum lo” ka ti hmuk a.

 

“Anih chuan rawn kal rawn kal a ngai em ni? Ka zahawm lo pawh a ni maithei, mahse, hetiang em ema inzah loh chu ka duh bik lo asin” a mittui chu a hru zauh a, ka lo hmuchiang ngang mai.

 

“Nute, ka zah loh vangah che I ngai maw?” a thutnaah chuan ka va thu ve a, a mittui chu ka hru a. “Ka zah loh vang che a ni lo asin, keimah pawh hi ka in thunun thei lo chu a nih hi. Engati nge khatih hun lai khan I tan ka awm loh? He thu hi ka inzawt reng a, ka inthiam thei lo” ka ti a.

 

“Engmah a danglam thei tawh chuang lo a, ka awm dan ang ang hian min en liam tawp la” a aw tawp lam chu a ri chang chang a ni.

 

“Ni e, chu chu ti thei ila ka duh khawp mai, mahse, keiin hlim taka chhungkua ka din lai hian mal leh khawhar takin I awm tih ka hriatna hian min tina si alawm” tih pahin ka kuah a, chet  pawh a tum lo.

 

“Engati nge ka ta I nih loh?” a ti sap a, ri si lo hian a tap tih hriat zetin ka taksa amah ka dehna chu a rawn huh a, chu mittui chuan min tina zual. Amah en tum chuan ka han khawih che a, mahse, a tang ve tlat.

 

“Engtia rei nge hetiang hian kana wm dawn kan hre silo a, kan theih chhung hi chuan min hnar bik lo la?” tiin ka han rawn a, min chhang mai lo.

 

Thil tam tak a ngaihtuah tih hriat tak hian a ngawi vang vang a, a tawpah chuan a insut hraih a, ka awma a beina atang chuan a inla hrang a.

 

“I kianga awm a, ka kianga I awm chu ka duhthusam ber a ni alawm. Mahse, I nupui hi keimah zawk lo ni ta ila, tuna kan awmdan ang hian in pahnihin lo awm ta ula ka rilru nat dan turzia ka ngaihtuah a, ka chunga thleng turin ka duh lo a, chuvangin an hmuh phak lohna hmuna lo chelh beh che hi ka thei lo” a ti ta a. Engmah sawi zawm tawh lo se ka duh avangin ka va ban a, a lu a lo thing a, a ding nghal vat a. “Chu chu ka thutlukna a nia, khawngaih takin min zawm sak hram ta che” a tih chuan zah awm ka ti lutuk.

 

“Chu chu I duh dan a nih chuan a tha vek e” tih pahin ka ding nulh a, a thutlukna chu a zahawmin amah pawh ka ngaisang zual , mahse, chutianga a hriata awm ka duh lo, inti ngeng tak hian ka chhuahsan a, tlawm ka inti deuh reuh pawh a ni maithei.

 

In ka thlen hnu chuan room ka pan ding a, ka zu dah that chu phawrhin ka han in teuh ringawt a. Ka in ve zeuh zeuh na in chutiangin ka rui ngai lo. Mahse, ruih vak ka chak, ka awmdan apiang ka ning vek. Engtia tam nge ka in ka hre lo, zing khawvar hma deuhin ka harh a, ka lu a lo na tluk tluk, ka tui in a hal huam huam bawk. Ka phone chu chhuatah a lo let reng a, ka nupui miscall a lo tam khawp mai, ka rum nghut a, nimin tlai atang khan a call ka la tawh lo. A chhan pawh ka hre lo, ka rilru hi a hel thut ka ti dawn nge, Nutei rinawmna nen ka lo teh ve deuh a ni mahna, ka duh loh ber thil a ni. Chuti chung chuan ka rilru hi ka thunun hneh hrih tlat si lo a, hetiang nun teh nuaih hi ka duh ngai lo asin.

 

Office-a ka awmlaiin ka fanuin min rawn call a, nidang ang lo takin kan inbe rei phian a, thla hmasaa a nu pawisa thawn an lo tla lo deuh ni ngei tur a ni, a rawn vui noh noh a, ka nuih a tiza angreng.

 

“I nu ka lo be chhin phawt dawn em ni?” ka tih chuan a duh lo ngang mai.

 

Chutia ka fiam nachhan pawh a nu hian a thawn tlem dawn lo tih ka hre reng a, a nu hriat lohin min rawn dil tih ka hriat kar vanga fiam chak ka ni.

 

“Ka rawn thawn belh dawn cheu nia, I nau pawh lo va pe ve la” ka tih chuan hlim takin kan inbiakna kan titawp ta a.

 

Ka fanu min rawn bia chuan ka boruak a ti ziaawm ta deuh, fate nge nge hi chu a dan a lo dang ve a ni e. Tuna ka hun tawn mek hi a liam ve vat anga, chhungkua hlim tak kan ni leh ngei ang tih ka ring nghet tlat. Tunah hian keimah leh keimah ka inbei mek a ni a, he hun hian min liamsan vat se ka ti.

 

Zanah ka nupuiin min rawn call a, tlaiah tlem ka lem hlek chauh a, ka lo pickup ve mai a. Thinrimna leh lungawi lohna nei miah lo ang hian min rawn bia a, hei hi a ni ka nupui ka fak ve thin em em na chu. A puitling a, min dawr dan tawk a thiam bawk a, hengte hian kan inkar hi a siam tha hneh em em thin a, kan damchhung hi chuan keimahah hian hetiang hian thawk reng se ka ti, amah min hlattir thei lo tu a ni thin reng a ni.

 

“Ka nu (keima nu zawk) hi ka ngaih a tha vak lo a, naktuk chu test ka neih pui dawn emawni ka ti a” a rawn ti dam dap a.

 

“Ama’n a duh dawn mi?” ka lo ti puat a.

 

“Ms, ka nu hi en liam tawp chi a ni lo tih ka awmdanah hian I hriatthiam ve mai ka ring a” a tih chuan tlemin ka ngaih a tha lo ve deuh.

 

“Nangman a awmdan chu I hrechiang ber anga, anih chuan test nei tur chuan lo nawr ve la” ka ti leh a.

 

“Tukin ka duty tur pawh khan ka tlawh kawi a, a lo mu reng a, Athlamuani khan nizan pawh a khuh tlaivar thute min lo hrilh a” atih chuan ka nu chu ka mitthlaah a cham ve roh roh.

 

Kan upa berte hi ka nu leh pa bulah an awm a, anni hi kan unauah chuan tlema ngaihtuahawm ber an nih avang hian ka pa in inpuiah a la lut leh ta kha a ni a, chuvanga keini zawk indang kan ni tih ka han zep tel lawk ange. Ka u hi a hriselna a that loh avangin sipai atangin a bang a, ka nupui neih hnu lawkah ka pa in a ko let a, ka nu leh pa thlazar hnuaiah an awm leh ta a ni. A nupui Athlamuani hi a fel em a, ka nu leh pa a duatin a ngaihsak a, ngaihngam takin keipawh ka awm. Chuvangin ka nu leh pa te hi ka lo thlahthlam deuh a ni maithei, ka inthiam lo ru kher mai.

 

Ka nu chu ka han call nghal a, kan inbiak chhung chuan vawi li vel a khuh hman a, a khuh chu a na riau a, a ruk tak chuan ka ngaituah ve ta hle. Inentir tura ka duh thu ka sawi lang ta tho a, Dinpuii’n a lo sawi hmuh tawh anih avangin a hreh lutuk tawh lo. Kan inbiak zawh hnu chuan ka rilru chu a buai ru ve riau mai, ka transfer hun a la ni lo tih ka hre tho na in hotute hnena thlen hrim hrim chu ka rilruk. Hetah chuan Nutei hmuh tur a lo awm ve reng bawk nen, thil hi a kal dik thei dawnin ka hre lo.

 

Chutianga hun kan hman ve zel chhung chuan krismas a lo hnai ve ta hle a, ka fate pawh an rawn haw tawh tih ka hria a, an kianga hun hman chu ka thlahlel ve tawh tak zet. Kei erawh kan hna kan buai vanglai tak a nih avangin duh angin ka chawl mai thei lo a, krismas leh kum thar inkara haw thlak mai chu ka tum. Ni khat chu bazaar lamah ka hawn thlak tur thil lei lawk ka duh avangin ka tei chhuak a, ka chhungte duh tura ka rin ho chu ka lei ve nual a, thil lei lam hi ka thiam tehchiam lo. Ka haw dawn chuan kawngpui hnuai lama Nutei rawn lang paw phei chu ka hmu chiang ngang mai, ka lo ding ve ta ringawt a. Chutia ka en reng lai chuan a bulah car a rawn ding a, hnehsawh zet hian kawngkhar chu a hawng a, a thu lut a, hlim taka a khalhtupa nen an inmelh leh an nui chuan ka thinlung hi a rawn chhun leh ta tlat. He thinlung tei vet hi ka va han haw ber tak e aw! Motor ah ka thil leiho chu ka dah sawk sawk a, ka tlan haw ta vang vang a, ka thinlung so bulh bulh chu tui vawta leih dai theiin ka inring.

 

Ka inbual zawh chuan meizial chu ka han tan a, hip zawh vek tum niawm tak hian ka han fawp a, ka thil in chuan hna a thawk tan mek tih hriat tak hian ka ngaihtuahna chu a rawn nu tan a, ka thawmhnaw chu ha in ka rilru thunun tumin ka chhungte ka bia a, ka haw theih hun turte hrilhin ka fate min thlakhlelhna chuan engemaw chen chu min thunun ve. Mahse, kan inbe zo a, ka duh loh zawk chuan min thunun hneh leh tlat a, ka motor chabi chu ban zawkin ka inher a, ka chhuak chu a ni leh nghal der. Khua a lo thim hman viau tawh, garage atangin motor ka la chhuak a, Nutei in lam pan chuan ka inkhalh chhuak ta vang vang a.

 

Kawngkhar chu a chum hian ka chum deuh bur bur, mangan hmel zeta Nutei’n a rawn hawn chuan min khar hnan ang tih hlau zet hian ka bawh lut rawp a, hlauhthawn hmel zeta min melh chu ka haw lutuk, kawngka chu ka kalh nghal rap.

 

“Eng.. enge I lo tih dawn?” a ti bah nak a.

 

“Tunge vawiina phur tu che kha?” ka ti nghal zat a.

 

“Joseph” a aw ah chuan min lawm lohzia ka hria.

 

“Mawh, tunge? Khapa kha tunge?” kan inmelh ran a, ka thu hriat duh ka hriat hma loh chuan kalsawn ka tum lo.

 

“I lo buaina tur a awm em ni? Nula ka nia, ka duh duh ka inphurhtir thei”

 

“Han sawi tha leh teh” tih nghut pahin ka pan hnai a, bangah chuan ka nawr bet a ni ber e.

 

“Engati nge ka nunah hian I lo buai em em? I nunah pawh ka inrawlh lo a, ka buai loh hi” tih pahin min nek sawn a tum a, ka lo nui lui hak. Engkim chuan min tithinrim a ni ber ang chu.

 

“Ka buai lo ang maw? I nunah ka buai lo ang maw?” tih pahin a dar lehlam lehlamah chuan nghet fe hian ka vuan a, a hmuiah chuan ka fawp nawk nawk a, ka chet dan chuan a ti hamhaih a ni ngei ang, second thum vel chu chet ngaihna pawh a hre lo. Chutah harh chhuak thut niawm tak hian a rawn che ta but a, kei lah ka lo inring em em si loa , ka tawlh deuh dawrh a, a mittui a tling pam.

 

“Hetiang em em hian I tenawm hi ka lo ring lo asin” tih leh min ben tumin a ban a rawn phar chhuak a, ka lo man bet a, a hma aia chiangin ka man bet a, ka fawp leh nghal zat. Keimaah sual awm hi an lo tangrual ngang a ni ang, chuti em ema ka che duh chu keimah ngei pawh hi mak ka inti.

Ads click leh liam liam ilaaaa.......