DAWN-12

 

DAWN – 12

(story of my life)

 

Kum a thar a, ka hna zawm a hun leh tawh avangin phur lo angreng takin ka inbuatsaih tan ve a. Ka nu pawh ngaihtuahawm lutuk a nih loh avangin tlem chuan ka rilru a nuam deuh. Kan nupa chungchangah erawh hmasawnna teh vak kan nei lo. Room khatah mu mah ila khum khatah kan mu tlang thei miau lo a, sofaah ka mu mai. A tirah kha chuan hrehawm ka ti viau a, ka ti rei lem lo. Zu ka in nasa bawk nen ka rilru a fim hman lo em a, engkim chu ka palzam vel mai mai a ni ber.

 

“Bawiha, in chhuk thlak leh hmain in rawn chho ve duh lawm ni?” tiin chaw kan ei laiin ka fapa chu ka zawt a, an lo phur unau viau mai. A nu erawh chuan kam khat mahin min chhang ve lo. Tihian a duh duh danin han awm phawt se, kan boruak pawh a tha veleh mai ang chu maw.

 

Champhai ka chhohna pawh kar khat a liam ve tar eng. Ka faten min zui an tum viau na in a nuin a lo hneh deuh nge ni kal dawn a ruaiah an thulh leh ta kha ania, a tha vek e. Ka chhoh hma khan kan hotute hmuh theih ang ang chu ka hmu kual ve a, Aizawl lama awm theih dan tur min ngaihtuahpui mai turin ka ti kha  a ni a, kan nupa pawh kan awm tlan chuan kan boruak a that leh mai ka ring. Zu erawh ka in tam mah mah chu a ni, nuam ka ti rih miau a, ka inhnem ve na awmchhun a ni rih tlat.

 

Ka hnaah ka kal bak chu ka chhuak ngai lem lo a, Nutei chanchin pawh engmah hriat zui ka nei ta lo. A chang chuan va hmuh ka chak a, ka tum deuh thut thut thin a, mahse, rah tha a chhuah dawn lo tih ka hrechiang em a, ka insum hram hram thin. Nupa nih ve si a han inbiak duh miah lohte hi a lo hrehawm ve reng, hei leh chen innei ve tawh ta chu engahmah inngaih loh ngawt theih a ni bik lo.

 

Tlai khat chu ka office bang thil lam kawi tur ka neih avangin keimahin ka inkhalh haw a, in ka thlen chuan kawtah Nutei chu a lo ding reng a, a ngaihna hre lo zetin ka melh reng ringawt.

 

“Ka rawn tibuai che a, pawi ka ti. Inhmu tawh miah lo turin kan intiam na a, tun chiah ka rawn hmu leh dawn che” a lo ti sawk sawk a.

 

“Rawn lut ve phawt la” tih pahin inchhung lamah kan inzui lut a. Sitting room ah chuan kan thu a, a rawn kal chhan tur awm ang chu ka hre mai lo.

 

“Tha tak khan kan inthlah a, engkim sawifel sa vek khan kan inthlah kha a ni a, engati nge tun thlenga min umzui a, min tihbuai reng a?” lungawi lo tih hriat zet hian a ti hlak a. A ngaihna hre lo zetin ka lo nui hawk.

 

“Nute, thil hriatsual I nei a nih ka ring. Tuma chanchin mah hi ka ngaihven lo” ka lo ti hmuk, ka lung a awi lo tun ringawt.

 

“Anih chuan ka chhungte bula thlalak I lo va dahte kha engtin nge I sawifiah dawn? Ka pa in tul lo zetin min rawn hauh phah hrep a, ka rin loh deuh deuhten min rawn biak phah nawlh nawlh bawk a” a tih chuan ka thu ngil deuh zawt.

 

“Eng thlalak nge?” ka lo ti var a.

 

“Kan inhmuh hnuhnun ber zan khan tu nge thla lak tura I lo rawih a? kan inkuah lai ber kher lehnghal” a tih chuan thil awmdan chu ka hrethiam deuh ruak ruak.

 

“Anih leh Nute, thil pakhat ka zawt ang che. Mala leh ka nupui hi an inhria em?” ka ti hlawl.

 

“Amah zawt la ni mai alawm” a lo ti daih.

 

“Ka hriat ngei ngei hi a ngai ania” ka tih chuan ka hmelah ka tih tak zia a hai bik lo.

 

“Joseph, engkim hi hrilh vek che ka chak thei lutuk, mahse, ka inrawlhna tur a awm lo a, sawi hi a tul ka ti leh ta lo. Chu bakah heng kum zozai a liam hnuah phei chuan” a ti sap a.

 

“Nang leh kei min pawtthentu chu I la tan zawk dawn amaw?” ka lo ti rum ul a.

 

“A tangkai tawh lo em alawm” a ti mai a.

 

“Mala leh Dinpuii chu an inhre ngai em? Chu chiah chu min hrilh la, a bak chu engmah I sawi ngai lo” tiin ka han thlem titih a.

 

A ngawi roh roh a, thil tam tak a ngaihtuah ve pawh a ni ang,a tawpah a haw hak a.

 

“Aw, hria e.” a ti hul hak.

 

“A tha e, chu zawng chu ka hriat duh chu a ni. Chuan, I chhungte bula thlalak thawntu tur pawh chu ka hre deuh mai e, ka tih a ni lo tih lo chiang phawt la. Ka chingfel vat ang” ka ti ta a.

 

A haw hnu pawh chuan ka rilruah ka hma lak dan tur chu ka ngaihtuah zui vang vang. Ka nupui hian inrawlhna a neih ka ring nghet bur tawh a, heti taka Nutei ngaitheilotu hi amah bakah midang an tel pawh ka ring. Chutianga mahni nupuite han rinhlelh chu ka duh loh zawng tak a ni a, ka inthiam lo bawk. Mahse, thil kaldan vel hi ka ngaihtuah ka ngaihtuah hian inrawlhna a nei hian ka hre bawk si a, a engahmah hma in ka na vawng vawng mai. Ka rinhlelhna hi dik lo se ka ti, ka chinfel hma erawh chuan ka rin mai theih ka ring tawh bawk si lo. Hetatang hi chuan engmah ka chingfel dawn lo, chuvangin ka transfer a fel hma leh ka chhui hma thei dawn tihna a ni mai. Kan hotute lah chu han nawr viau chi an ni si lo, khati taka zu in nasa hman si khan ka thlah fel hmak. Thil hote avanga ruihtheihthil hmanga intihchhiat atthlakzia ka hre tawh a, rilru siam felin fim taka hmachhawn chu ka tum ta a ni.

 

Rilru chu hmanhmawh viau mah se thil a tih zung zung theih si loh a, April thla kan chuangkai leh der tawh. Sorkar kum thar lamah law law min tihfel an tum thu ka hre tawh a, tlem chuan thaw a veng deuh. Ka chhungte bulah erawh engmah ka sawi lo, ka nupui nen ngat phei chuan kan fate chungchangah bak kan inbe lo. Tun hnaiah erawh min rawn biak zeuh zeuh a ching a, min biak bakin ka be ngai hran lo. Ka haw hran lo a, mahse, amah thlahlel ngawih ngawiha ka haw thla khatih tehhrep a min thlahthlam avaang khan ka chhungril hi a dam lo a ni ber ang. Ka ngai ta miah lo a ni lo, zanah ngat phei chuan ka ngai ve ngawih ngawih fo a, mahse, tlawm hnu hnua awm hmasak ka tum ta lo. Kum 16 chhung chu a lakah ka tlawm tawh a, kan boruak a fuh loh ai chuan tiin ka tlawm hreh ngai lo a nih kha. Pawn lama inti pa ve tak si hi ka nupui hmaa ka tlawm ral zia ka hrechhuak lo thei lo, tunah kher hi chuan tlawm hmasak ka tum lo bur.

 

*loan lak belh ka duh a, kawm thlang lam atanga insak hi ka pa in min sawi hmuh fo bawk nen, pawisa lo inren deuh la* tih message min rawn thawn chu ka chhiar a, ka chhang lo.

 

Mi ngaihah chuan nupa hlawh nei, officer kan ni ve a, mahse, kan fate hi kan chawm thei ngawr ngawr a ni. Ka hlawh hi kan hmang hnem zawk a, a hlawh erawh nakina insak chhunzawm nan dah tha turin ka hrilh tam a, a dah ve zelah ka lo ngai a, loan lak ut ut ngai lo tura ruahmanna ka lo neih vang a ni. Tunah loan lak a sawi ri a, ka ngaihdan a ni lo viau a, engmah erawh sawi ka tum lo. A duh dan chuan thil han kaltir phawt se, chhui chhuah belh tur pawh a la awm mahna. Khaw hran hranah ka awm kual ve ta fe mai a, ani erawh chu vawihnih sawn a tawk ve tawh a, chu pawh rei lo te te a ni, ka hnena awmna remchang a hmuh pawhin a duh ngai lo a, khang laite khan amah ka khawngaih vang leh khawpui tluk awma ka hriat loh vangin lung loah pawh ka la ngai lo a nih kha. Tunhnaiah erawh ngaihbel tur thil ka hmu chhuak zut a, kan pahniha kana wma kan hlim em thin vang leh min thlakhlelh ve em thin vang khan ka lung a awi mai zel. Tunah erawh chuan ka mit a lo del rei deuh niin ka hria a, ka fate nu a nih miau avangin thil lo tisual pawh nise ngaihdam chu ka tum ang. Chutihrualin Nutei a rawn tel ve chiah a, ani hi chuan ka buaina hi min rawn tawmpui lo se, tuman tibuai lo se ka duh vangin tuna ka thil chhui tur pawh hi ka kalpui dawn a ni. Tuin nge mahni nupuite tihdik loh hre chak ang? Ka chak lo a, a lo fihlim phei chuan ka chhui vang leh ka rinhlelh vangin keimah hi ka inthiam dawn lo tih ka hria. Tunah erawh a turin min tur a, hai chhuah tur awm ang ang hi chu hai chhuah vek ka duh. Keipawh ka thiam vek lo ang tih zawng sawi kher pawh a ngai lo, Nutei hming hliau tel ve hian ka duh loh thleng thlengin min nawr ta a nih ber chu. Hetiang tak hian ani hi ka lo hmangaih pawh a ni ange, engtikah mah ani nen hian kan inkawp leh rem tawh dawn lo pawh nise keimah vanga a tawrhna hi chu tawp tawh se tih ka duh vanga heng ruahmanna hi nei ka ni. Amah hrilh ka tum lo a, ka chhui chhuah hunah chuan a laka thil sual titu hian a tihzawm ngam tawh loh turin ka che anga, tichuan ka nun atangin ka kal tir hlen tawh ang.

 

“Transfer order kha I lo hmu em?”

 

Ka thianpa Rama min rawn biak rual chuan new dak a lehkha rawn thleng chu ka lo ban ve chiah a.

 

“Hei ka hmu chiah” tih pahin ka hawng nghal a.

 

“Thil hi kan va intihtheih hleih thin ve” tiin a rawn nui kur kur.

 

“Thianpa, ka mamawh dawn che a nia, engemaw thil chhui duh ka nei a” ka han ti nghal thawr a. Ani hi biak ka lo tum reng reng a, min rawn be hmasa ta a ni.

 

“Engthil nge ni a? Puih theihna che ka neih phawt chuan ka tlanchhe dawn lo tih I hria alawm” a lo ti thlap.

 

“Ex minister Pu Zamlova tupa Malsawma, thingrai te pawh tawlh ru thin kha I hre ve em kha?” ka ti a.

 

“A hming hi chu ka hre ve fu tawh a, a takah hian kan la intawng miah lo a” a ti a.

 

“Ama chungchangah khan eng engemaw chhui ngai ka nei a, mimal thil a nih avangin a ruk deuha chhui ka duh a” ka tih chuan a rawn thaw ri hak a.

 

“Thianpa, dan leh dun chu I hre vek a, chumi bawhchhiat ngai khawp thil awm chu a pawimawh viauin ka ring a, I tan chuan engmah tih hreh ka nei lo e” tiin min chhang. Ni e, ani hi chuan min puih a hreh ka ring lo reng a ni, mahse, a hna in a tawrh phah erawh ka hlau ve lutuk tho, keimah hi ka fimkhkur hle a ngai dawn a ni.

 

Aizawl lamah ka insawn dawn takah chuan chhungte hrilh loh ngawt theih hek lo, ka nupui pawh ka hrilh ve a, a hma ai chuan kan inbe tam ve deuh a, kan boruak chhe zualpui pawh a zia ve deuh tawh. Chutianga haw thla mai tura engkim ka tihfel hnu lawkah chuan chanchin duhawm lo leh thinthawng zet ka hre ta tlat mai. Nutei’n beih a tawk a, a in an suasam hrep bakah amah pawh chemtein an vit a, a dinhmun a that loh em avangin Aizawl lamah an phur thla tih chu……