DAWN-13

 

DAWN – 13

(story of my life)

 

Aizawl lamah ka awm fel tawh a, ka hnaah ka buai chhunzawm bawk nen Nutei hmu tura vawikhat ka kal bak kha ka kal nawn thei ta rih lo a, engemaw chhui chhuah tur a awm kha a tirah ka ring zet na in a khawihtupa ber a inpuan tawh avang leh a inpuanna chu a rintlaka ka ngaih avangin misual a tawng palh tih chu ka ngaihdan nghet a ni tawh a, ka thil chhui lai mek nen inzawmna a neiin ka hre lo. A chanchin ngaihven ang vuta awm kha thil mawi a nih loh bakah a rem chiah lo bawk nen inthiam lo ru viau mah ila ka ngaihsak lo lui ve deuh reng reng a ni.

 

Kan fate an awm lo bawk nen nupa chauha khawsak chu a khawharthlak ve duh thin khawp mai. A tir lama ka sawi tawh ang khan kan fate an puitlin loh hi a nu hian a hlau em em reng a, naupang te an nih lai atangin Kalimpong ah boarding school tha an tihah kan dah daih tawh a, kei tak hi chuan tawrh har ka ti deuh thin a, an tana tha tur a nih vang erawh chuan ka hnial ngai lo. Tun thlengin an han awmbo a, a chang chuan lehkhazir lama hlawhtling viau si hian kan society tan hian an chhenfakawm lo ang tih hi ka hlau thin. An rawn haw ve chang pawhin chawhma inkhawm bak hi chu an tih turah hian an dah tlat lo mai a, ka hau ve fo a, ka nupui erawh chuan lehkhazir laia kohhrana tel tam lutuk that loh thu bakin a lo chhan ngai lo a, ka sawi peih ta lo. Dinpuii nutei fate hi kan awmpui thin a, pakhat a zir chhuak a, midang an rawn awm leh a, chutiang chuan a inchhawkin an rawn awm ve reng reng a, chu chuan kan khawhar lutuk tur min chhawk ve thin a, ka awm loh phei chuan awmpui hriat chian hleih loh lak ai chuan ka lo duh zawk bawk nen tihian tun thlengin a naupang ber Batei phei chu kan bulah a la awm ta zel a ni. Ani hian M.Sc a zo tawh a, private school pakhatah a thawk ve a, a nau te rawn haw changin an lehkha zir a vil ve thin bawk a, kan hmang tangkai fu. Helama ka han awm leh takah chuan nupa na na na chu kan boruak pawh a zia awm veleh mai a, mahse, keimah hian ka thinlung kilkhatah hriat duh ka neih avangin ka nupui pawh thlim chang ka ngah mai.

 

Chutianga thla thum vel a ral hnu chuan ka thianpa hnen atangin thu mak deuh mai ka hre thar a, Mala kha civil hospitalah hian hun rei tak enkawl niin thi si lo dam si loin a awm tih chu a ni. Chutiang a nih chuan tunge a hminga hna kal lai mek hi khawih ang tih chu kan chhui a ngai ta, chumi piah lamah Nutei chunga a thil tihsual man pawh ka la hmuh tir ve lo a, fair lo ka ti hle.

 

“Mala saw a chhungte beidawn hun in nghak em ni?”

 

Kan chawei laiin ka nupui bulah chuan ka ti satliah a, mak tih hmel deuh hian min rawn thlek a, a insiamrem leh vat thung.

 

“A ni ber ang chu. Engtin nge I hriat zawk a?” pangngai thei ang berin min chhang a.

 

“Ama hming hian business a la kal reng a, ka reh fuh hunah chuan a chhungte chuan dam turin an duh tawh kher lo maithei” tih pahin ka thleng ka chawi a, ka nupui hian inrawlhna a neih chuan ka thusawi pakhat lek chuan hna a thawk ang tih ka chiang ve emai.

 

Office ah nilengin ka thu a, hna hmanhmawhthlak a awm lem lo bawk a, Rama document min rawn thawnho chu ka bih kual a, bul tan dan tur chiah ka hre lo angreng viau. ka Chutihrual chuan risk ka lak ngamte pawh a ngai maithei. Ka phone a rawn ri a, ka han en vat a, Dinpuii a lo ni.

 

“Dam lo serious deuh kan nei a, keima case a ni si a, hei tunah ka haw lawk a, ka kal leh nghal dawn a. Ka rawn haw dawn leh dawn loh chu ka rawn hrilh leh mai ang che” a ti a. Engemawti takin ka phur deuh surh mai.

 

Ban hma deuhin office ka chhuahsan a, tunlai chu mahni hna buaipui vang hian driver hruai loin ka chhuak mai zel a, a awlsam bakah engemaw thil kalsual palh awm ka hlauh vang a ni. Rama office lamah ka inkhalh phei a, a haw chiah an tih avangin a in lam panin ka chhuak zui nghal. Ka zuk thlen chuan a motor a lo hung tha chiah a, a nupui fanaute an zin avangin a ina han kalchilh pawh chu ka inthlahrung lem lo.

 

“Thil lem lawk ka lo tum asin” a inchhung kan inzui luh chuan a ti zauh a.

 

“A tul lo emai, nghei ve teh” ka lo ti hluk. Ani lah chu a nui sung ringawt a.

 

“Lokal rawh, ka office ah lamah” a tih chuan inchung lamah kan inzui chho nghal a. Ani hi kan ukil neih that ber pawl a ni a, Shillong-a lehkha zir dun reng kan nih piah lamah a pa nu leh ka pa nu te hi unau piang hmun ang maia lo khawsaho an ni. Zu han in ve zauh hi a ching a, buaipui awm khawp leh mi hriat khawp erawh chuan a in ngai lo.

 

“Dinpuii enthlak chu kan tan tawh em” tih pahin a drawer atangin a in tur chu a rawn phawrh chhuak a, engmah ka sawi hmain no chu min han lak chhuah kep nghal zat a, hnial pawh ka tum hran tawh lo.

 

“Enthla tan dawn em niang” ka lo ti a, a nui leh hawk hawk.

 

“Ruahmanna I neih chu ka ring tawh tho a, thil pakhat hmuh chhuah thar ka neih chu company pakhat, minister hluite ho intelkhawmin buaipui an nei tih hi I hre tawh em?” a ti leh daih.

 

Ka no dwam lai chu ka han her kual a, chu thil chu kar kalta khan ka hre deuh thuak a, ka case a nih lem loh vang leh ka thil chhui laiin ka rilru a lak pen em vangin ka lo ngaihven lutuk lo a nih kha.

 

“Ka hre thawi thuak” ka lo ti a.

 

“Pu Zamlova leh a tupa Malsawma hi an inrawlh tel ve hmel riau a, midang pawh an awm nual na a, I tan anni pahnih hi an pawimawhin ka ring a. Tin, Malsawma hian a phenah mi tuemaw a nei tih hi chu ka chiang tawh. Chu chu I chhui chhuah turah dah ta ila, a huphurhawm angem?” a ti dap dap a.

 

“Thianpa, thil kal vel dan hi ka hrethiam teh nuaih tawh lo e a. Ka ngaihtuah nasat poh leh ka rilru hi a buai tulh tulh. Ka nupui ka rinhlelh hi chu nang bak hretu an awm lo a, Nutei atanga intanin tihian thil hi a hnawk ta nuai mai a ni a, remkhawm harsa ka ti tlat” tiin ka chhang ta duah.

 

“Nakinah chuan a inremkhawm fuh vek mai ang, hmanhmawh lo phawt mai la. Zaninah programme duansa I nei em?” tih pahin min han thlit belh a tum chuan ka lu ka lo thing a. Ka in lohna a rei ta bawk nen ka kai mai dawnin ka hria.

 

“Hospitalah min va kalsak turin ka duh che. Ka nupuiin damlo serious a neih thu leh zan pawh a rawn haw lo maithei tih thu min rawn hrilh a, a damlo hi Mala a nih chuan thil chhui a awl sawt dawn a” ka ti a.

 

“A pawi hleinem. Ka’n nu awm loh lai a ni hlauh a, thil tih pawh a awlsam deuh alawm” a tih chuan ka thaw huai.

 

In ka thlen chuan ka inbual nghal a, Batei chuan chaw ei a lo peih diam tawh. Ani hi an unau ro ro ah pawh min ngaina tak taktu a ni a, keipawhin ka duhsak em em a, a unaute an hnawk ka tihna lam ni loin kan chhungkaw tan pawh ka ring ngam zan.

 

“Bate, I nutei nen chauh in awm thin lai khan in khua a har thei viau lo maw?” zawhna satliah anga lang thei turin ka han ti zauh a.

 

“Kan pahnih tak chuan kan awm khat a”

 

A tawng tawp chawt a, ka ngaihven duh lo lui a, ka tha erawh a khur deuh.

 

“Naupang tuition ka pekte hi an rawn kal ve reng a” sehchilh angreng deuh hian a ti leh a, kei police officer senior ve tawh tak hian a chezia chu ka hai lo hrim hrim.

 

“I nutei hi chu a taima si a, a bula awm hi a hahthlak a nia. A rilru erawh chhiat miah loh hi, nangni unau phei chu a ngaihtuah em em reng cheu a, nakinah pawh in ngaihtuah zui ve tur a ni ang” ka han ti a, a rilru lakpen chu a hun tih ka hriat vang a ni.

 

Chaw eikhamah zial zu turin inchung bathlar lam ka pan a, Aizawl khawpui phe tuar chu thlir dauh dauh pahin meizial chu ka zu vang vang a, ka nupui hian min phatsan lo se tihna hlirin ka khat. Nupui uire neih ka duh lo a, ka fate nu atan chutiang chu ka phal lo bawk. Ka thaw chhuak ham ham a, engati nge hetiang buaina hi ka neih tak fo mai le?

 

Mu pahin lehkhabu ka chhiar a, mu pah han tih lemah khumah ka thu mu a ni mah. Rama min rawn biak hun ka ngaichang a, ka nupui pawh ka ngaichang pah bawk. Dar 9 a ni tawh a, engmah min rawn la hrilh lo ve ve. Ka thil chhiar lai pawh chuan ka rilru an luah hlei thei lo chu a ni ber e.

 

*cabin no 5 bulah ka awm mek a, rawn kal ve phawt mai teh*

 

Rama message ka hmuh rual chuan ka inperh tho nghal a, ka inseam sawk sawk a, damdawiin lam pan chuan ka tlan chhuak nghal a. Sitting rooma Batei’n a nutei a be lai chu ka zuk hrethawi thuak hman. Chaw kan ei laia ka zawhna zawh kha a nutei a lo heilh mek a, hre ang pawhin ka awm lo.

 

“Hna pawimawh lutuk a awm thut a, office ah ka kal lawk dawn” tiin ka chhuak ta kha a nia, thil dik lo hi chu a awm ngei a ni.

 

Damdawiin ka thleng tep tihin ka phone chu a rawn ri a, Dinpuii a lo ni.

 

“Hei ka rawn haw dawn chiah a, min lo hruai thei angem?” a rawn ti a, chhan mai dan tur ka hre lo. “I peih loh viau chuan taxi ka rawn la mai dawn em ni?” a tih leh chuan ni theiin ka hre ta si lo a, ka hruai tur thu ka hrilh ta ringawt.

 

Rama bulah thil awmdan ka sawi a, min lo nghah tur thu a sawi avangin ka nupui chu inah hruai haw phawt ka tum. Tawk fang kawta ka din hnuah ka nupui chu biain pawna ka nghah thu ka hrilh a, reiloteah a rawn lang nghal.

 

“Officeah tih tur ka nei a, ka thlah che anga, ka kal leh nghal ang” ka ti a, chiang zet hian min melh tih ka hria.

 

“Zaninte chu hun thawl kan nei ve tawh ang chu tih naklaia” tih pahin ka mal vel chu a rawn hrut thuak thuak a, ‘lemchanna’ tih hi ka rilruah a rawn lut nghal zat.

 

“Ka rawn haw leh vat dawn alawm”tih pahin phur hmel fe hian ka han melh ve a, lemchan thiam lo ka ni bik hleinem le.

 

In kan thlen chuan uar fe hian min han fawp a, kei lahin ka thinrim rukna hrikthlak tum awm fahran hian ka lo fawp na viau.

 

“Min va dim lo tak” tih pahin a hmui thi ser ser chu a kutin a han khawih a, ka lo nui ru suk.

 

“Min lo nghak rawh aw” tih pahin dam deuh hian ka han fawp leh a, a phur leh hmel viau mai.

 

Ka tlan liam thlengin min en tih ka hriat vangin kan office kawng lamah chuan ka peng thla zeuh a, ngaihtha taka inchhunga a luh ka rin hnu feah kual chho lehin damdawiin lam ka pan ta chauh. Ka va thlen chuan Rama chu pawnah a lo ding vang a, meizial a lo pak khu lat lat a.

 

“I ring dik e, I nupui damlo enkawl chu Malsawma ngei a ni e. Naktukah hospital dangah an sawn dawn a, chumi buaipuitu pawh chu I nupui ngei hi a ni e” a ti ta a.