DAWN- 8

 

DAWN – 8

(story of my life)

 

Ka hna vanga ka buai fe a nih loh chuan Nutei chuan ka rilru a luah ngut ngut a, thil dik a ni lo tih chu ka hria a, mahse, kei hian tih dik loh nei tlatin ka inhre si a, ka hriatchhuah hma chuan ka hahdam dawn lo tih ka inhria. Khatia amah nen kan inhmuh atang khan thla a liam leh tawh a, kan inhmu nawn leh ta rih lo. Ka nupuiin nithum lek chawlh rawn hman a tum avangin ka ngaihtuahnaah pawh dah loh hram hram ka tum a, thei tak ang maw?

 

Dinpuii hmuak turin ka chhuak a, Champhai ka awm hnua a rawn kal vawikhatna tur a ni a, hun a neih loh em avangin rawn kal tur pawh hian ka beisei lem lova, a khat tawka ka haw ve reng reng avangin pawi kan ti lem lo. Vengthlangah ka lo chang a, an rawn thleng dawn tawha ka rin vangin tlemin office atangin ka chhuak hma ve a, an rawn thleng lawk lo lehnghal. Chutia mi dawr kawta ka thut lai chuan Nutei chu ka thutna thlang dawr atangin a rawn chhuak chiah a, ani chuan min hmu ve lo. Ka awmna lam panin a rawn chho a, min rawn hnaih tak viau hnuah chauh min hmu ve a, min kal pelh mai a tum lai chuan ka lo ko a, a ding hret a.

 

“Inbe lawk ila” ka ti sup a.

 

“Engmah sawi tur kan nei hleinem” a ti dam dap a.

 

“Hmannia I thusawi kha hriatchian ka duh” ka lo ti thung.

 

“Joseph, hun kal tawh siamthat theih tawh loh vangin buai tawh lo ang” a ti a, kan velah chuan mi an awm ve noh noh avangin thil sawi the teuh a rem si lo, ka enliam ta ringawt.

 

Dinpuii te rawn thlen lai pawh chuan Nutei ringawt kha ka rilruah a awm a, ka inthiam lo angreng. Ka quarter lam panin kan inkhalh haw a.

 

“I nuamsam lo em ni? I va han ngawichawi ve” ka nupuii’n a tih chuan ka harh zawk. Kan tlan chhuah atang khan ka lo la tawng miah lo tih ka hrechhuak ve chiah.

 

“Ka chau deuh a” tih zawngin ka chhang.

 

In kan thleng a, ka nupui inbual chhungin a thawmhnaw ka lo rem fel sak a, hmeichhe ti thlip thlep a nih avangin cham rei dawn lo mah se thawmhnaw a rawn inkeng leh nual. Ka nui suk a, inthlakna pakhat ka duhtawk leh dawn nen, ani hi zawng ka nupui dik tak kha a ni e.

 

“Ms, tunge ardali saw a hming?” a tih chuan hrilh nachang ka lo hre miah lo lehpek.

 

“Peka anih saw, a fel a nia” ka lo ti a.

 

“Nia, a fel khawp mai. I quarter chu a hlui tawh ang aiin a chhung chu a nuam phian a” a ti a.

 

“Peka saw a fel a, hnimte hi ka nei hman reng reng hleinem. A tih tur nia ka hriat loh thleng hian a vai hma vek a, inthlahrun chang hi ka nei thin zawk a” ka lo ti a.

 

“A theihna ang angah te han duat ve la, that leh that in inlawm a ni mai” a ti a.

 

Mahnia awm rei tawh tih takah ka nupui motor chuang chau pawh ka dim thei meuh lo, hetiang hunah hian ka nupui hi a chhuanawm thin reng a, min tihhlawhchham hi a duh ngai lo a, ka tan chuan a theihtawp hi a chhuah ve thin. Thinlung inhmu tawn tak chungin kan muhil ve ta a, hemi zan hian Nutei ka hre chhuak miah lo, theihnghilh tak tein ka theihnghilh ve a, hetiang hi ni zel se ka ti zawk. Amah ngeiin a sawi ang khan thil kal tawh leh kan hun liam tawh kha engmah a siam that theih tawh miau lo a, mahni kawng ve veah kan hlawhtling bawk a, hlim tak hian awm zel ila tih hi ka duhthusam a ni.

 

Zing ka harh chuan keimah chauhin ka lo mu tawh a, choka lam atangin chawhmeh rim rawn chhuak chu ka lo hip a, ka nupuiin ei rawng a bawl tih ka hre thei mai. Tho mai lo chuan ka han maimitchhing leh vang vang a, ka fate hmel a rawn lang a, chhungkua ka din tawh a, Nutei hnimhnaih chu ka tan thang a ni thei tih ka inhrilh mawlh mawlh hnuah ka tho chhuak ve ta a.

 

Chawlh a nih avangin ka nupui chu bazaar lamah ka len chhuah pui a, hemi chawlh denchhena rawn kal a nip ah bawk a, a remchang fu mai. Khawchhak thil nepnawi chi hrang hrang a lei a, kan fate thawn tur vel a nih avangin a duham khawp mai. A engahmah chu ka hre hrang ve lo a, ani erawh chuan a hming nen lam a sawi thei deuh vek. Ka haw thlak dawn pawh hian min rawn chah ve fo a, ka hmuh hmasak apiang hi ka lei ringawt zel kha a nia, kan inang lo khawp mai.

 

Pawnah meizial ka lo zu a, bawr angreng tak hian a rawn chhuak a, a parcel chu ka lo lak sak vat a, a rit zek lehnghal. Fate ngaihtuah em em leh atchilh tlut chi a nih vang hian keiin ka lo ngaihtuah phak lem loh hi a ngaihtuah vek a, phaia kan dah dawn pawh khan kei chuan tul ka ti lutuk lo. Ani erawh chuan an naupantet atang khan an rilru kha tihhuaisen a, mahnia din tir kha a lo tum em em thung. Tun hnuah te hian an unau hian an admission leh hostel engkim hi anmahniin an inbuaipui vek tawh a, ka rin aiin an fel ve riau bawk. A ring tawk thiam a, kan fate pawh hian chutiang chiah chuan awm an tum ve niin ka hria.

 

Heta chhungte ve bera ka neih, ka pa thianpa, ka pa Thianga te inah tlai chaw kan ei dawn a, in lama haw tawh loin chu lam chu kan pan tlang ta a. Keimahni chiah chaw ei tur emaw ka inti thla vei rawk a, pawna motor ding vang chuan let leh daih ka duh rum rum. Engvanga Nutei chu chulai hmuna kal ve nge a nih? Ka pa Thianga te hian chaw ei tir an tum ve chu a ni lo ang chu maw? Chu’ng ngaihtuahna chuan second hnih khat chhung lekin min ti buai hman vek. Ka pa Thianga hi a hna avanga Aizawla awm reng thin anih avangin ka nupui pawh an chhungkuaah chuan a mikhual bik lo.

 

Pawnah ka pa Thianga a lo ding a, min hmuh chuan a lo ri vei hlut a, Dinpuii nen chuan an han inkuah leh ang nawk nawk a. An ri dun bawrh bawrh a, kei erawh chu an bulah ngawi rengin ka lo ding a, Nutei hmachhawn ka huphurh vang ni maw, ka tha te chu a khur ru der der lehnghal. Keimah chauh chuan ni ila ka hmachhawn theih mai ka ring a, ka nupui nena min hmu tlang tur hian a tihnat ka ring ve ringawt.

 

“Kan tunu Nutei pawh chaw ei turin ka lo sawm tel ve a, hmanni lawkah helamah a hna a rawn zawm ve a, chaweiah kan lo la sawm hman si lo a, a hrana tih ai chuan kan tia, ani pawh a rawn thleng tawh a. Hawh u, I lut ang u” a ti a, kan lut chu a ni nghal mai.

 

Inchhung kan luh chuan Nutei hmel ka zawng nghal a, ka hmu mai lo. Choka lama thawm awmah chuan ka hawi kual a, ka va hmu ta. Ka pa Thianga nupui Nu Puii nen chuan gas thuk bulah dingin chawhmeh chu an lo en vel niawm tak a ni, a nui deuh var var bawk a, ka lung zawn rawn phu leh dawt dawt chu tihziaawm tumin hmundang ka hawi ta daih a.

 

“Mama nu, hei Joseph-a te an rawn thleng e” tia Pa Thianga’n an nu a hrilh rual chuan an pahnihin an rawn hawi phei a, Nutei hmela mak tihna chu ka va hmu nghal.

 

Nu Puii chu a rawn kal phei a, Dinpuii nen chuan an han inchibai a, eng engemaw sawiin an phul zui hlut bawk a, nakin deuhah chuan ka nu Puii hian a natna eng engemaw sawiin damdawi a inchawhtir leh dawn tih ka hrechiang lutuk!

 

“Tihian engzat nge khawsa che u?” tiin ka nupuii’n a zawt a. Ka tho nulh a, choka lamah chuan ka phei ta ringawt.

 

‘Nang I ni maw?” Nutei dinhmun lai angreng taka a awm chu ka khawngaih ve a ni.

 

“Um.. teh daih che u chuan” a lo ti ve mai a.

 

“Nia, a mak ngawt mai” tiin ka nui a, a nui ve lo.

 

Bathroom atangin Ruati, Pa Thianga fanu a rawn chhuak a.

 

“U Seph, in lo thleng tawh law?”tih pahin Nutei bulah a ding a, chawhmeh chu a hawng a, a chawk nghal a. “In nu chu ka vawikhat hmuhna, a va chhe lo ve” tih pahin Ruati chuan min han nuih a. Ka buai kual vel vek, hetiang hmunah hian thusawi thiam a har duh.

 

“A tha lo te chu neih bik thu awm suh” ka han ti ta ringawt a.

 

“Sitting room lamah lo va phei ve ula, hei kan bawl zo chu a ni deuh mai a” a tih chuan Nutei chu a phei nghal nalh.

 

“U Seph” tih pahin Ruati chuan ka banah a lo pawt a.

 

“Enge ni?”

 

“U Nutei nen khan in inhre tawh tiraw?”

 

“Um, hria e. Engati nge?”

 

“In nu saw a cham rei dawn em?”

 

“Naktuk tuk lehah a haw thla ang”

 

“A haw hunah thil zawh duh che ka la nei, tunah chuan a ngai lo” tih pahin ka ban a vawn chu a thlah a. Keipawh sitting room lamah chuan ka phei ve ta a.

 

Rei vak lo kan thut khawmuan hnuah Pa Thianga chuan chhung inkhawm hmangin chaw kan ei chhunzawm ta nghal a. Nu Puii’n ngaihsan hmel deuha Dinpuii a biak apiangin Nutei ka lo khawngaih a, a hrehawm ka awmdan mai mai chu.

 

“Nichin khan ka lo sawi lo a, Nutei nu hi ka farnu a nia, ka tunu a nih chu. Vanneihthlak takin education officer in helamah a rawn awm hlauh mai a, kan inhnuaiah rawn awm rawh kan tih lahin min hlau nge ni a duh tlat lo mai a” Pa Thianga chuan fiamthu hian a ti a. Dinpuii chuan chiang angreng deuh hian a melh a, Nutei erawh chuan a thleng a bih thung. A hma zawng khan Dinpuii hian a hrechhuak lo a, tunah a hrechhuak ta niin ka hria. Mahse, chutiang lam chu engmah a sawi chuang lo.

 

“Chhungte hnaih lutuk a awm hi chu kan khawr deuh a, a nuam miah lo asin” titu chu ka nupui.

 

“Nula an la ni si a, ka ngaihtuah deuh thin a, ani lah hian engmah hi a hlauh hmel si loh a, a buaithlak a ni” Nu Puii chuan a ti a, Dinpuii ka lo melh nghal vat, nula tih khan a thawng hle ang tih kha ka ring reng a.

 

Nutei leh Ruati chu an inbe ve zeuh zeuh a, a bak chu a ngawi deuh char char. Kan boruak rit ru tak chu tlanchhuahsan ka chak zek zek.

 

Room tukverh ka hawng a, meizial chu ka pak khu laih laih a, Dinpuii chuan ka zial khu vai kian that that pahin parda chu a rawn siam rem a.

 

“Ms, Nutei nen khan tinge in inbiak miah loh a? An school ah I thawk tawh tih pawh hriat lohin alawm le in inmihran le” a rawn tita chiah.

 

“A.. han sawi em em tur a awm lo em alawm. Kan thlen hlim khan ka va bia alawm”

 

“Enteh, a la nula tih kha mak ka ti lutuk a. Minister monu ang khan a thang chhuak vek sia, enge a awmzia ni ang le” tiin tukverh lam chu a hawi ve vang vang a.

 

“A ho emai, titeh, thingpui sen hang I in teh ang” ka tih chuan min rawn zui ve ta vat a.

 

Tunah chuan ka parawl leh ta, Dinpuii min hawsan hnua ka khawsak chhoh dan tak hi a ni ka duh loh leh ka awm dan tura ka lo ruat ngai loh thin chu. Patling pui tawh, hna zahawm tak thawk leh nupui fanau nei tawh hian ka thinlunga thi tawh emaw ka tih kha ka tawn leh hnu hian thinlung mu hnu a kai tho a, patling hi a lo patlin theih lohzia ka hriatchhuah tak chu ni. Khatih hun laia ka thinlung tina em emtu kha nula a lo la ni tih leh a mawhphurtu nia min hriattirna te chu hriatchian chakin ka tuihal a nih hi! Ka zan mutnaah te hian ka nupui aiin amah ka ngaihtuah hnem a, a dik lo tih hre reng chungin ka suangtuahna hian a hnen a lo thleng hman si thin a, keimah leh keimah pawh ka inchingfel hlei thei der ta lo.

 

(In mak ve e, regular deuhin han dah ila, in comment tha peih lo a, han reh deuh ila in lo lang truam truam a, in sual siiiiiiii…. 😝 Tak takin, tunlai chu kan hri vang hian hunawl a vang ve riau a, ka regu loh pawhin ka complete ngei dawn tih khan lo inhnem phawt mai teh u 🥰)