DAWN 9

 

DAWN – 9

(the story of my life)

 

“Joseph, ka sawi chian viau kha, engmah sawi chhuah hi ka duh tawh lo. Chhungkua I din tawh a, hetia nunhlui vanga inhnimhnaih hi ka duh tawh lo” a ti fak fak a. A zahawm ka ti, mahse, tunah hi chuan Joseph Malsawmkima kha ka ni tawh lo, ka danglam vek tawh tlat a ni.

 

“Nute, khawngaih takin thu dik tak sawi teh, Mala nen khan in innei lo anih chuan engati nge khang hunlai khan min ngaihsak loh? Engati nge ka rilru a na dawn tih hre reng chunga engmah I rawn sawi loh?” ka ti a.

 

“Joseph..” a mittui a tla a, ka inrin hman hmain ka hruksak.

 

“Tihnat che kha ka duh ngai lo, nangpawhin I duh ngai loh kha” ka ti a, ka thusawi chuan ka tina zual ting ni mai hian ka hria, a insut hlap hlap a.

 

“Midang ta I nih hi ka ring ngai lo a, ka taah ka lo ngai nghet lutuk che khan min tina a, vawiin ni thlengin tu mipa mah hi hnaih ka thei tawh lo. Nangmah vangin ka na a, mahse, dem thei che erawh ka ni lo” a ti a.

 

“I chanchin ka hriat chian hma chuan kalsan nawn che hi ka tum lo, engkim zep loin min hrilh vek rawh” ka ti a.

 

A thutna atangin a tho a, min hnungchhawn zawngin a ding a, ral lehlam chu a thlir vang vang a, a mittui la hul kim lo chu light hnuaiah chuan a tle siar siar a, ka thinlung hi vih ang maiin a na vawng vawng.

 

“Nangmah nen kan inkawp dawn khan Mala bulah ka thiam ang tawkin a dawnsawn dan awlsam tura ka hriat dan berin ka hrilh a, a tirah chuan a rilru a na a, a thin pawh a rim. Mahse, mi a a ni lem lo a, a hnuah chuan min lawmpui thu sawiin duhsaknate kha min hlan nghe nghe a, Keipawhin a hma ang bawkin thiantha tak angin ka en veleh mai a, ka chungah rilru chhia a put kha ka ring ngai lo. Inneih kan tum hnai em tih kha min zawt ngun khawp mai a, a chhan ka hriat miau loh avangin thudik kha ka hrilh ve mai zel a. Tikhan kan chhungte veveah pawh harsatna awm lovin i insawn chhuah hun chauh kan nghak tawh a nih kha. Zankhat chu ka peih lo chungin lehkha pawimawh tak a pu te inah lam a ngai tih sawiin kan inah min rawn sawm a, chhuah kha ka tum lo hrim hrim a, ka nawmsam loh thu ka hrilh nghe nghe. Mahse, ka telloa kal a tum loh thu leh ka nulat hun chhung a rei tawh dawn loh vanga min sawm a nih thute, zanin bak chu min tihbuai tawh loh tur thute a sawi a. Hun kal tawh zawng zawngah khan a sualna leh ka chunga rilru chhia a put a ngai ka hriat loh avangin chuti taka rawn ti chu kalpui mai ka tum ve ta a. Ka rilru erawh a kim zan lo, zan dangah pawh ka tihtur neih apiangin min kal pui thin a, ka mipa rin ngam a nih ve tawh avangin dawt a sawi lah ka ring lo. Chuti chung chuan ka rilru a nuam lo a, a hriat laiin Mami ka be lui ta kher a, Mala nen chhuah kan tum thute chu ring lenglawngin ka sawi a, ka chunga engemaw a thlen loh nan ka ti a ni ber.

 

Kan in atangin kan chhuak chiah a, kan hnungah motor dangin min rawn zui nghal a, ka ngaih that lohna a zual sauh a, Mala hmelah chuan engmah hmuh ka la nei chuang lo. Sikulpuikawn kan thleng chiah a, a pute veng lama kan kal tak lohah chuan ka tha hi a rawn khur nghal a, Mala steering chu ka va kuai ta vak a, khata a mitmeng kha engtikah mah ka la hmu ngai lo a, hmuh leh pawh hi ka duh tawh lo. A mit a sen vek a, min atchilh ngawih ngawihtu ni thin khan ka lakah engmah pawisak a nei lo ni mai awm hian min phih sawk sawk a, kan accident mai ka hlauh avangin ka tibuai duh ta lo.

 

“Kum kha leh chen kha ka nghak che a, awlsam taka I tlangvalpa ka neihtir che hi I ring em ni?” min ti a, ka tap nghal zawih zawih a. Joseph, I hming kha ka lam a, ka lam nawn reng asin. Engati nge ani kha ka lo zui chhuah? Keimah leh keimah ka indem a, engmah a sawt tawh si lo. Mahse, thil pakhat erawh chiang eem em a awm, khami zanah khan chhuak lo mah ila remchang kha a zawng char char a lo ni tih hi. Aizawl khawchhung kan tlan pel a, kan hnunga mite kha a thiante an lo ni ngei a, hmun reh laiah chuan motor chu tidingin ka chuannaah chuan mi pahnih hi an rawn lut a, buaina ka siam loh nan ti niawm takin ka hmui chu an rawn tuam nghal a, engmah tih theih nei siloa awm kha a rapthlak asin.

 

Tham niawm takah min hruai a, zankhuain chutah chuan min awmpui a, thildang kha engmah Pathian hnenah khan ka dil lo. Ka thianghlimna min zuahsak tur khan tap zawih zawihin ka tawngtai a, ka tawngtai tlaivar thak. Zingah Mala chu ka awmnaah a rawn kal a.

 

“Hetiang em em hian ka la tlawm ngai lo, tlawm ka duh ngai lo tih I lo la hre ve lo a nih hmel a, zir lai ka han zir tir hlak che a nih kha. Tunah chuan I bialpa pawhin kan inru angin a hre vek tawh a, amah I va tihbuai khan awmzia a nei thui tawh lo ang. Ka nupui hlui I ni reng tawh ang” tih pahin min hmuhsit hmel tak hian min en a.

 

“Mala, khawngaih takin min kaltir rawh” ka ti a.

 

“I kal dawn alawm, I hmanhmawh a nih kha. I rin aiin ka sual em? Mahse, ka sual vak lo, ka chunga I thiltih ka thungrul ve mai che a nia. Misual tak tak chu ni ila maw, nizanah khan ka nula I ni thei reng, mahse, chutiang em ema hmeichhe rawp ka ni lo hlauh a, I vannei khawp mai. Ka nupui hlui anga thang tawh si a, I chunga engmah ka tih loh hian ka thil tum a ti hlawhtling zawk dawn in ka hria. I bialpa chuan a ten ngawih ngawih tawh che anga, mahse, I la thianghlim tih nangmah chiahin I hre dawn si a, ka rilru I tihhrehawm man chu I tuar ve a ni ang chu” tiin min pawt tho dawrh a, ka mittui tla zawih zawih chu na fe hian min hruk sak a.

 

“Nihnih hnuah I haw ang, chumi hma chu ka thu hi awih la, I him a ni mai” tiin min chhuahsan leh ta a.”

 

Ka tho ve lawk a, ka insum hman tawh lo, Nutei tap khur ngat ngat chu ka va kuah ta chawt a, ani pawh a inthunun thei bik lo a ni ang, min lo kuah let ve tawk tawk a.

 

“Nute, a tawk tawh, sawi tawh suh” ka ti a.

 

“Aih, hre vek law law rawh” a ti tham chel a.

 

“Anih chuan ti rawh, tah hian thu ang” tih pahin thutthlengah chuan ka thutpui a, ka kuahna chu ka la thlah chuang lo.

 

“A sawi ang khan nihnih hnuah kan inah min dah leh a, ka chhungte thinrim lutuk chuan min be duh lo a, ka room kha ka khawvel a ni tawp. Thudik pawh sawi ni ila engmah tih theih nei chuangin ka inhre lo. Minister tupa meuh kha chu khing pawh ni ila ka hneh dawn lo tih ka hria a, mahniin ka tuar ta ngawt ngawt mai a ni. Thla khat a liam hnuah Mami a rawh haw a, a hnenah thudik chu ka hrilh ta vek a, ka nu leh pa hnenah pawh amah vekin min sawi sak a, thudik an hriat takah chuan ka pa lung a awi lo hle a, police hnena report thehlut turin min ti a. Mahse, chutiang meuh kan thleng dawn a nih chuan ka mualpho dan tur ka ngaihtuah a, nangma hnena thudik sawi phawt a, I puihnaa kal ka duh ta zawk a, zah pawh dawn loin Kolasib ah ka rawn pan ta che a. Mahse, kal lama ka beiseina zawng zawng kha I quarter kawta I nauten tumah i hmuh duh loh thu an lo sawi khan a thamral ta vek a, nangpawhin ka thusawi I awih ngai dawn lo a ni tih ka hria a, mittui nen ka haw leh asin. Beiseina pakhat chauh neiin I hnen ka rawn pan che a, beidawngin ka haw leh si a, khawvel kha ka tan chuan beisei ve tur neiin ka inhre lo. Ka room kha ka khawvel a ni a, tumah ka hmu peih lo a, ka be peih hek lo. Ka chhungte bulah neih che ka duh lo tih ka sawi ta ringawt a, kumkhuain kei hi min dem se ka duh vang a ni. A chhan chu mipa tumah hi ka hnimhnai tawh ngai dawn lo tih kha ka inhrechiang em a, a mawh kha phur vek ila ka duh zawk.

 

Hun a liam ve zel a, Aizawl lamah I awm tawh tihte kha ka lo hre ve zel a, hmu chak em em chung che khan hmuh che ka hreh lawi a, ka room bathlar atang hian kawngpui hi ka thlir reng thin. Engtin emaw tak I rawn tlan lai hmuh che beisei khan! Mami khan min lainat em em a, nangmah hmuh che kha a tum viau thin a, ka vau beh ve tlat vang khan a rawn hmu ngam ta bik em lo che a, vawikhat tal ka hmu lo che a nih chuan kumkhuaa ka inchhir tawh tur thu kha min hrilh reng thin. Krismas boruak a ni chho a, keipawh ka tawm a mai dawna in hriain bazar lamah ka chhuak ve a, harsa taka ka thinlung atanga paih bo che ka tum lai khan hmeichhe pakhat nen ka hmu tlang ta che a, ka tliak nawn leh ta awn awn mai a ni. Nung hming pu si hian a lo thih theih tih kha kei tluka hrechiang an awm lo ang. Khatianga awlsam deuha midang nen ka hmu tlang cheu kha I rilru tur ngaihtuah miah lo khan ka lo dem em em che a, tun hnuah erawh ka dem tawh lo che. I tan khan ka huatthla dawn em a, ka tenawm dawn tih kha ka hrethiam chho a, mahse, engati nge vawikhat tal thudik hriat kha I tum loh tih hi vawiin ni thlengin ka la inzawt thin.”

 

“Thil hi a va pawi thui tak em” ka ti a, sawi tur dang thlawt ka hre lo a ni.

 

“Ka tana ruat I nih loh vang a ni tih ka hrethiam tawh a, tun hi kan inhmuh tawpna ni rawh se” a ti a.

 

“Nute, kan in pawh I hre reng a, ka chhungte nen pawh in innel em em a, tinge min rawn hmuh kha I tum miah loh?” ka han ti tha leh a.

 

“Hmeichhe tenawm ber tia min sawi hnu khan ka rawn hmu ngam ang che maw?”

 

“Engtik lai mahin hmeichhe tenawm ka la ti ngai lo che, I ngaihdan kal pui teh suh” ka lo ti hluk.

 

“Joseph, min hrechiang tawk em? Dawt hmangin vawikhat mah insawi thiam ka la tum ngai lo, thudik ka sawi vanga ka chunga I thinrim ngunzia kha I hria em?” a tih chuan ka ngawi vang vang.

 

“Anih chuan tu hnen atangin nge hmeichhe tenawm ka tih che chu I hriat?”

 

“Ka sawi loh hi a tha zawk”

 

“Sawi rawh, I sawi loh chuan ka tihbuai zui loh che hi ring suh” tiin ka vau ringawt.

 

“Min vau suh”

 

“Ka vau lo che, ka mizia chu I hria alawm”

 

“Haw phawt la, zanin atan chuan kan sawi tam tawk tawh”

 

“Thudik chu ka la hre tho ang” tih pahin ka ding hluai a. “Ka rawn hmu leh vat ang che” tiin ka chhuahsan ta a.